Il frut cui cjavei ros
Dopo vê vût sîs fruts moros, il setim al è nassût cui cjavei ros.
«Tu mi âs fats i cuars!» al diseve l’om. «Disimi di cui che al è chel frut…», ma jê no veve mai volût rispuindi a chê domande. Fin che e je rivade in fin di vite…
«Cumò biadelore tu mi disarâs di cui che al è chel frut: no tu âs plui nuie ce pierdi!»
«Chel al è to, a son chei altris sîs che no son tiei…»
I mats e il salût al Duce
Intun manicomi a spietavin la visite dal Duce e il cjâf infermîr si dave un grant dafâ a istruî i mats su cemût che a vevin di compuartâsi pe ocasion. Al rive il Duce. Ducj i mats a son inschiriâts dilunc de corsie a cja dal jet.
Il cjâf infermîr al vose: «Saluto al Duce!». Ducj i mats sul atenti a fasin il salût a la romane. Un dal acompagnatori al domande al cjâf infermîr: «E tu, parcè no saludistu?»
«No soi mighe mat jo, ve!» ❚
