O publichìn vulintîr cheste letare di Bepi Agostinis, grant ativist pai dirits dai furlans (in particolâr al à sburtât cetant par vê une Compagnie Stabil di Teatri furlan). Al è un messaç par pre Roman Michelot, ma che ducj noaltris de redazion o condividìn. Pre Roman, autôr de rubriche chi dongje a çampe, no lu vin visât: al cjatarà une sorprese.
Mandi pre Roman,
o ai let sul gjornâl de grande fieste che ti àn fat i tiei parochians*, o soi une vore content par te “predi”, cui timps che a corin no si sint dispès chest tacament al predi. Chest, parcè si viôt che, in ducj chescj agns, tu âs savût semenâ ben, no dome cul concet de religjon, che nol è facil, ma soredut come predi e om furlan. Tu âs savût trasmeti il to grant amôr pal Friûl e pe nestre lenghe, e chest di sigûr al è stât l’anel just par cheste maraveose union cu la tô int. Ti à judât di sigûr ancje la creazion dal côr parochiâl che daspò al è, o pensi, un grup che al cjantarà lis nestri vilotis, ator pai paîs, continuant chê tradizion che di agnorums al è stât il centri de vite di ogni paîs, ma dispès vuê, di chest anel di agregazion no si sint la necessitât. Une volte, cheste istituzion e nasseve propit te parochie, di sigûr cuntun predi che al voleve la int dongje la glesie, e chest al voleve dî vê un paîs unît, e chê e je la robe impuartante par vê une union cristiane tal vêr sen de peraule, judâsi tai moments grivis, dant une man cence pretindi nuie in cambi. Tu âs fat un biel lavôr in ducj chescj agns, e la int lu à dimostrât. O speri che chest to esempli al vegni viodût di bon voli, e come vuide pai tiei amîs predis, di ca e di là dal Tiliment. Felicitazions di cûr, e che il Signôr ti sedi simpri dongje a vuidâti come che al à fat fin cumò. Duncje no sta a preocupâti se lis altis jerarchiis no àn un voli di rivuart viers di te, l’impuartant al è che la int lu vedi, che di sigûr a continuaran a volêti ben. Cun afiet e amirazion pal tô operât, no dome cu la tô int, duncje come predi, che al è impuartant, ma pal tô grant amôr e impegn pe nestre lenghe e pal Friûl, un calorôs mandi.
Bepi Agostinis
*ai 29 di Zenâr, finide messe, i parochians di Vilegnove di Sant Denêl a àn organizât di gustâ in onôr di pre Roman pai 35 agns che al è rivât tant che predi inte frazion.