Tremait: a tornin lis striis! Gnove leterature e musiche su lis feminis dai voi triscj

«Marie Strie petene to fie, petenile ben cul pietin di len, petenile mâl cul pietin di sâl». Cheste e altris detulis, proverbis, rimis, mûts di dî, a son part dal grant patrimoni orâl furlan dedicât aes striis. Femenatis brutis, dai triscj voi, messede jerbis cu lis moschetis, bassarotis dentri un gabanot fruiât, cu la velete sul cjâf a taponâ i cjavelats blancs. Sorte di befanis, ma reâls, veris rispiet a tancj altris personaçs dal imagjinari popolâr come lis aganis, i sbilfs, i guriuts, i maçarots. Lis striis a son feminis di paîs, mâl inseridis intes comunitâts, invidiosis, furbis, paronis di segrets imparâts de none, de mari, che dispès ur àn donât ancje i fiers dal mistîr: une cite dulà messedâ lis jerbis, un libri segret e une vuiscje di paugnat. Une cuistion ereditarie, un pat cul diaul che si invere tal sanc e che al devente eterni.
Tra mît, leiende e veretât, lis striis no smetin mai di fâ cjacarâ di se. Contis, poesiis, romançs, une vaste leterature che e cjape dentri ancje il teatri, la art visive, la musiche, il cine, la television, tai fondai di un Friûl platât, misteriôs, che si mostre di gnot, tal segret, cun maliis, dispiets, maleficis, tristeriis. Cartomantis, comaris, drece gnerfs a abitin di simpri il Friûl, almancul a partî dal Concili di Trent – ma sigûr ancje prime -, cuant che si à tacât a brusâlis. A tornin però, simpriverdis, tal mont contemporani. Di fat, e je di pôc la jessude di doi contribûts interessants sul lôr cont, inte leterature e inte musiche.
«Il cerchio delle streghe», antologjie dedicade ae strionarie in Friûl, al è un bon esempli. Un libri resint publicât di Morganti Editori che al met insiemi dîs scritoris che si son dedicadis cun competence, fantasie e passion a chest teme che al reste atuâl. Stefania Conte, Erica Gallini, Pamela Gotti, Sabrina Gregori, Miriam Davide, Maristella Leandrin, Barbara Pascoli, Tiziana Perini, Manuela Quaglia, Vania Russo, nus contin il grant fenomen midiant di diviersis epochis e lûcs: lis campagnis de Basse, lis monts de Cjargne, fin il Venit, a son l’ambient di liendis tra veretât e fantasie, che al è ben di savê.
«Lis striis di Tencje» al è invezit un progjet musicâl realizât dal Grup fisarmoniciscj di Tarcint insiemi ai Balarins de Riviere. Si trate di un toc musicâl e coreografic par vot armonichis, struments eletronics e vot balarins, scrit di Massimo Pividori cul jutori di Roberto Michelizza. E je une storie ispirade de poesie di Giosuè Carducci Le streghe del Tenchia, indulà che un grup di striis e cjate un grup di contadins. Il finâl al è a sorprese, par une performance che e je stade presentade in diviersis ocasions e che no mancjarà di jessi proponude dilunc la Primevere e l’Istât in Friûl. La prossime date e je ai 4 di Març tal teatri di Dartigne.
«Crôs di Diu, non di Jesù e di Marie, se a ‘nd è cualchi strie, che le mandi vie», une altre detule. Ma lôr a tornin simpri, e se prime i lûcs preferîts a jerin inte Valangjine a Çurçuvint, a Malmaluvi a Trep di Cjargne, tal Plan de Maine a Dieç e vie indenant, cumò si puedin cjatâ dapardut, sedi in campagne che in citât. Magari plui bielis, plui zovinis, ma ancjemò ligjeriis.
✒ Alessio Screm
___________________________________
Cualchi libri par savênt di plui
E je cetante leterature furlane dedicade aes Striis. Tra i scrits plui interessants, o ricuardìn la conte di Caterina Percoto: Lis striis di Gjermanie (S.F.F.), ma ancje altris lavôrs e studis sul sogjet. Valentino Ostermann: La vita in Friuli. Usi, costumi e credenze popolari (Del Bianco, 1940); Lea D’Orlandi e Novella Cantarutti: Esseri mitici nelle tradizioni friulane (Ce Fastu? XXVI – 1950); Andreina Ciceri Nicoloso: Tradizioni popolari in Friuli (Chiandetti, 1982); Ornella Lazzaro: Le amare erbe. Un processo di stregoneria nel Friuli del Seicento (Biblioteca dell’Immagine, 1992); Renato Vidoni: Striaments. Spiegazione e risoluzione simbolica della sventura in Val Pesarina (Tesi di laurea, Università di Trieste, 1994); Pietro Spirito Le indemoniate di Verzegnis (Guanda, 2000); Manuela Quaglia Non ci credo alle streghe, però…! (Ass. Cult. Elio cav. Cortolezzis, 2001); AA.VV.: Il cerchio delle streghe (Morganti, 2016).