(L)INT FURLANE. Se no cumò, cuant?

Ce che al è daûr a sucedi intal Pd al è l’ultin segnâl dal degrât de politiche taliane, di une classe politiche buine dome di curâ i siei interès di caste, proponint un model di societât centraliste che e esclût, di fat, la maiorance dai citadins no dome dal control des istituzions, ma ancje le somet ae logjiche de ineficience mafiose, de mancjade poie aes fassis plui debilis e ae sumission a centris finanziaris cence scrupui e mots dome de logjiche dal profit e di un capitalisim aromai cence control.
***Inte fotografie di une italiute mandade in nuie, nol è dome il Pd: i tegnin compagnie degne i partîts dal centri diestre, dulà che Forza Italia e je aromai sometude aes sbaradis leghistis, che il lôr leader Salvini al à la muse rote di fâsi imortalâ in bande dal manifest famôs cu la imagjin di un cjâf piel rosse e la scrite «No fasarìn la fin di une risierve indiane», metint une maiute cu la inficje di Trump. Sì, chel president  che, a pene elet, tant che prin at de sô aministrazion, al à decidût di fâ passâ l’oleodot sui terens sacris dai Sioux, cundut de resistence incagnide di chescj ca.
***No se puartin fûr miôr i Cinque Stelle ae prime prove impuartante di aministradôrs, cu la al sindiche Raggi buine in pôcs mês di imitâ i siei predecessôrs inte gjestion de capitâl.
***Che si tegnin Rome, che si tegnin lis beghis de çampe e de diestre, che si tegnin ancje i traditôrs dal federalisim, chei che aromai cence tricolôr no fasin un pas in barbe a Pontida e al Parlament dal Nord, ma intant in Friûl ce fasìno?
***Devant dal sveâsi de cussience autonomiste, cuasi une dibisugne in chest panorame misar, aromai verificade dal sucès di tantis iniziativis, dal interès mediatic che le cengle, dai pinsîrs che e provoche intes dependance locâls dai partîts talians, in tancj aromai a domandin la rapresentance politiche di chest sintî. Une esigjence che no rivuarde dome cualchi furlanist iluminât, chei cuatri gjats cemût che ju definive Tondo, ma che e slargje lis sôs basis di consens tra sindics, oms e feminis de culture, de scuele, dal mont sindicâl e produtîf, de glesie furlane.
***Une propueste, ma lu definirès un ultimatum, e je partide dal Pat pe autonomie che al à proponût doi emendaments sempliçs di presentâ in parlament par consintî ae minorance furlane di podê elei i siei rapresentants cemût che za si pues fâ in Trentin – Sud Tirôl e in Val di Aoste, ma no in Friûl e Sardegne. Dignitât pâr, insume. O viodarìn se i parlamentârs furlans a varan chest cûr dopo jessisi incjocâts a peraulis in difese de autonomie e de specialitât. Jo no i crôt.
***Se chest nol sucedès, il Pat al è pront a formalizâ la sô jentrade in cjamp par difindi i interès dal Friûl. Nissune croçule duncje pai partîts o pes formazions talianis, nissun acuardi eletorâl, ma biadelore la pussibilitât di autorapresentâsi.
***Une pussibilitât reâl pal popul furlan di no vê di dipendi di segretariis di partît romanis o milanesis. Une ocasion, forsit la ultime, di jessi parons dal nestri destin. ❚
✒ Dree Valcic