CUATRI RIDADIS

Parcè sieristu i voi…
Te ostarie: «Parcè sieristu i voi cuant che tu bevis?» i domande Tite al so compagn Bepi.
«Parcè che il miedi mi à dit: il vin, nancje cjalâlu!»
Cuatri di lôr sul tren
A son suntun tren un cjargnel, un triestin, une muinie e une biele fantate. Tal scûr di une galarie si sint “paf!”, il rumôr di un pataf. Tornâts fûr, si viôt il triestin che si ten la man su la muse.
La muinie e pense: «Sigûr che i à metût lis mans intor ae fantate e chê i à slungjât un scufiot!»
La fantate de sô part: «Chel là al voleve tocjâmi me e invezit al è lât a finîle su la muinie, stupidat!»
Il triestin: «Chel lazar di un cjargnel al à palpade la fantate e chê, crodint che o fos jo, mi à patafât me»
Il cjargnel: «Chel basoâl di un triestin che i ai dât un pataf, no ai di vêi fat trop mâl; te prossime galarie i darai un sgarduf!» ❚