NO PAR FURLAN… MA BOGNS. La Union europeane tra opinion publiche, istituzions e relazions internazionâls | Ajëret, il svint dal rock arbëreshë de Peppa Marriti Band

La Union europeane tra opinion publiche, istituzions e relazions internazionâls
Tal 60m inovâl dai Tratâts di Rome, la voie di documentâsi e di fâ cualchi pensament in cont dal procès di integrazion continentâl e de situazion de Europe di vuê e di doman e pues cjatâ sodisfazion te leture di doi libris, jessûts sù par jù un an e mieç indaûr. Il prin, par cure di Giovanni Finizio e Umberto Morelli, al met dongje une schirie di saçs che a tocjin la cussì clamade politiche di sigurece e di difese de UE, tra teorie e pratiche e tra storie e atualitât. Il secont, metût adun di Marinella Belluati e Paolo Caraffini, al è une racuelte di contribûts dedicâts ae creazion dal Parlament european e dai partîts a nivel continentâl, aes prospetivis pal avignî e ai rapuarts tra informazion, opinion publiche e partecipazion politiche in Europe.
G. Finizio e U. Morelli (par cure di), “L’Unione Europea nelle relazioni internazionali”, Carocci, Rome, 2015; M. Belluati e Paolo Caraffini (par cure di), “L’Unione Europea tra istituzioni e opinione pubblica”, Carocci, Rome, 2015. ❚
Marco Stolfo

Ajëret, il svint dal rock arbëreshë de Peppa Marriti Band
Cul 2017 e torne a fâsi viodi e scoltâ la Peppa Marriti Band, formazion che di passe vincj agns e messede cun risultâts interessants la lenghe proprie – l’ arbëreshë –  cul rock, cul folk e cun altris ritmis e lengaçs musicâi.  Il gnûf cd, saltât fûr sul imprin di chest an, si clame ‘Ajëret’ (ven a dî ‘aiars’ o ‘svints’) e al presente dodis tocs dinamics e ispirâts che a tocjin il cjâf, il cûr e lis orelis. Si va dal tîr de cjançon che i da il titul al disc ae atmosfere di une gnove version di ‘Kavreshta’, un classic dal repertori dal grup di San Demetrio Corone, fintremai ae ruspiose interpretazion de tradizion dai vjershë di ‘Holqa një shërtimë’, ae malinconie migrante di ‘Si Cingra’ e ae ande manouche di ‘Nje harofull te nje döre’.
Musiche e peraulis de comunitât albanese de Calabrie che a son fuartis e vivarosis.
Peppa Marriti Band, “Ajëret”, cd MK Records, 2017. ❚
Marco Stolfo