Parâ fòur Març a Andreis

A Andreis, piçul comun dal cjanâl de Ciline, a fin Fevrâr al è il costum di fâ il Parâ fòur Març. “Parâ fòur”, par scrivilu inte variante furlane locâl, al significhe propit mandâ vie: i abitants di Andreis a pensavin ce Març che al fos un brut mês, ploiôs dispès e cussì a volevin parâlu vie (fûr) prime ancjemò che al rivàs.
Al esisteve ancje un proverbi a rivuart: «Pasca marçôsa, mortilitât famosa», che al vûl dî che se Pasche e cole intal mês di Març, il pericul di epidemiis al è sigûr e cognossût.
Il costum, ce tant antîc e che al fâs part dal patrimoni tradizionâl de zone, al previodeve che ai 28 di Fevrâr o il 29 in câs di an bisest, i fruts e i zovins a lassin ator pes viis dal paîs e des frazions munîts di sampogns di vacje o di cjavre. Cierts di lôr, che une volte si metevin intor piels di piore o di cjavre, e che a rapresentin il mês Març, a van pes stradis par prins. Chei altris ur van daûr scjassant i sampogns e berlant: «Fòur Març che Avrîl ‘l è ca!».
Si diseve ancje cheste filastrocje: «Marzo cagarzo, chiel fiol de un can de Marzo, che fa morir le pecore, che fa crepà il pastòur, chel fiol de un can de un cagadòur!».
La tradizion e ven fûr di rituâi pagans antîcs, che e vevin chê di disveâ, cul sun dai sampogns, la Vierte, la nature e la biele stagjon.
Une tradizion scuasit compagne e je difondude par dut l’Altiplan di Asiago, ma ancje intal Padoan e intal Trevisan. Li le clamin Ciamar Marso, al contrari di Andreis: e segne il passaç dal Invier ae Vierte, dal frêt al cjalt, de segregazion invernâl ae vite comunitarie che i prins cjalts a facilitin. Adults e fruts, oms e feminis a batin, a batin cence padin cualsisedi supuart al fasi rumôr, par sveâ la nature e la voie di tornâ a vivi dopo il letarc invernâl. Al stes timp si impiin i fûcs, simii di chei furlans epifanics: insume une sorte di prin dal an venit. ❚
✒ Stella Bucco