Une Stel ae presidence dal Istitût Tellini

Cambi de vuardie ae presidence dal Istitût Achille Tellini: il vieli president Luigi Geromet al passe il testemoni a Silla Stel. La decision e je stade fate buine dal gnûf Consei Diretîf, nomenât a Otubar de assemblee dai socis che e à rinovât ancje il gnûf Coleç dai Revisôrs (formât cumò di Alberto Contin, Franco Lattanzi e Gianfranco Passone).
Un grant agrât al è stât pandût al vieli President Luigi Geromet pai tancj agns che, cun passion e sgrimie, al à tignût sù l’Istitût.
Daûr statût, il gnûf Consei Diretîf, che al à dentri Antonio Buiani, Michele Calligaris, Gianluca Comar, Alessandro Pian e Silla Stel, al à votât tant che Presidente de clape culturâl la dotore Silla Stel di Vuanis. A jê i van i auguris di bon lavôr ancje di bande de nestre redazion.
L’Istitût Achille Tellini, cun sede a Manzan, al è nassût tal 1992, in gracie de volontât di un trop di studiôs unîts dal amôr pe civiltât e pe culture furlanis, che si son dâts di fâ par salvâ e meti in lûs un patrimoni popolâr storic e culturâl di grant valôr. A son tantis lis publicazions fatis vie pai agns tal cjamp de art, leterature, culture popolâr, pedagogjie. La ultime e je stade Il gno jessi tal mont. Il mio stare al mondo. Poesiis. Poesie (1966-2009), la racuelte di poesiis di Galliano Zof par cure di Manuela Quaglia. Zof al è stât un dai socis fondadôrs dal Istitût. ❚ (Dree)