Dicembar al vûl dî Nadâl e nancje in Friûl e mancjin lis fiestis e i rituâi. No dome marcjadins, ben altri: o vin un patrimoni antîc e unic, fat di usancis diviersis e particolârs par ogni lûc, che e cjatin lis primis olmis significativis inte tradizion de glesie di Aquilee, cence dismenteâ lis dirivancis celtichis e romanis. Come il cjant dal Missus est, il toc evangjelic di Sant Luche che al conte de aparizion dal Agnul a Marie e che al ven cjantât intai nûf dîs prime di Nadâl. Ogni paîs al à la sô maniere di eseguîlu, ma in dutis lis formis al conserve la antighe cantilene aquileiese.
De vilie di Nadâl al Prin dal an, a ‘nd è ce tantis ocasions par partecipâ aes pratichis furlanis leadis ae vignude dal Signôr. Prin inmò, ai cinc di Dicembar, in diviersis localitâts al passe Sant Nicolau, e duncje i fruts a spietin, metint fûr dal balçon scarpis o cjalcis, che al rivi l’om cu la barbe lungje, che ur puarte dolçs e altris goloseçs. Famose e je la vignude dal Sant in compagnie dai Krampus, dialulaçs, figuris nereosis, miezis oms e miezis bestiis, in Val Cjanâl e in Cjargne.
Dispès in Friûl si impiin fûr di cjase i “nadalins”, o “zocs” la vilie di Nadâl, ven a stai dai çocs di len, par tignî cjalde la famee fint al Prin dal an. In altris puescj, come a Paulâr o a Sauris, ai 24 sot sere o l’ultime gnot dal an, un grop di zovins al va di cjase in cjase cjantant cjançons di Nadâl, vistûts di Re Mâcs, cun tune stele leade a un baston, par saludâ, mangjâ, bevi e stâ in buine compagnie.
Par ricuardâ Renzo Balzan (grant cultôr des tradizions cjargnelis), o cjapìn di lui cualchi biele rie leade a cheste ricorence: «In cierts paîs si usave ancje benedî la cjase e la propietât. E po ducj tor ator dal fûc in spiete de miezegnot, a veglâ in cheste gnot dal sigûr meraculose. Un pôc d’ascôs, daûr dal fogolâr, i morôs si scambiavin siops, che po mangjavin insiemit. Aes liendis dai nonos, aes preieris, (in cierts lûcs si tignive sù il rosari) si messedavin i evivis augurâi di vin o vin brulè o aghe di vite dulà che magari si tocjave dentri i colaçs di sope o i mostaçons, che la parone di cjase e veve preparât denant trat su lis guantieris, e no mancjavin lis stechis di mandolât. In fin, par sierâ la cene de vee in glorie, a rivavin dispès ancje lis fritulis». ❚
✒ Alessio Screm
