Sfuei Mensîl Furlan Indipendent
Archivi de Patrie

COGNONS DAL FRIÛL

............

Midiant de storie dai cognons furlans, si fâs ancje la storie dal nestri Friûl. In Dicembar, cul frêt, par scjaldâsi e ven ben une sgnape e cussì us proponìn cualchi cognon di chei che le fasin.
(Gjavâts fûr di I cognomi del Friuli di Enos Costantini e Giovanni Fantini ed. La Bassa/LithoStampa. O ringraciìn i autôrs pe disponibilitât e pe colaborazion).
CESCHIA
Dal furlan Cescje, ven a stâi une forme scurtade di Francescje. Cognon carateristic dal Ciman (in comun di Sant Denêl) e di Nimis, si cjate ancje a Magnan, Glemone, Tarcint, Buie, Gurize, Roncjis, Sant Canzian, Pradaman, Tavagnà, Cormons, Puçui e in tantis altris localitâts. 1407 Ceschje ad Artegna; 1445 Zeschia de Gaian; 1522 dictus de la Ceschia a Porcia.
DOMENIS
Dal non di persone furlan Domeni o miôr di une sô antighe e ben documentade variante: Domenis. Par esempli Toni filg Domenis a Glemone intal 1380, e un mestri domenis al faseve il pistor, ven a stâi il pancôr, a Cividât intal 1414. Cheste forme e podarès jessi une latinizazion notarîl ma e podarès jessi ancje une forme di diminutîf otignude cul sufìs is.
Chest cognon al è tipic di Rodda in comun di Pulfar, e di chi al è lât jù jù in val e dopo inte zone di Cividât, dulà che al è difondût avonde.
MANGILLI
Di probabile divignince lombarde, si cjatilu a Paulêt, Flumignan e Udin. Il non forsit al ven di un steme di famee che al veve dai zîs (“gligli”, apont, par talian). Intal 1750 Processo di Aloisia Partistagno contro Giobatta Mangilli.
NONINO/NONINI
Diminutîf probabil di Noni a sô volte diminutîf di Jaroni (par talian Girolamo). La forme Nonini e je carateristiche di Buri e al è presint ancje a Manzan. Nonino al è presint a Buri e tant plui difondût a Pradaman, Remanzâs, Udin e si pues cjatâ a Trivignan e Pasian di Prât. Intal 1544 don Michele Nonino de Orefici offic. in Corno; 1573 i Nonin di Cerneglons fittuali Coo. Ottelio.
PAGURA
Cognon carateristic di Castions di Çopule, li che al è documentât dal Cuatricent (1425 Johannes Matie Paura; 1430 Mathie Paura; 1461 Andreani Paura de Casteons). Al ven fûr probabilmentri dal sostantîf paura (pôre): si podarès tratâ di un sorenon deventât dopo cognon dât a une persone paurose o a une persone che e faseve pôre. ❚

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +