La stele alpine dal Friûl nus lasse Renzo Balzan, une vôs identitarie

Edelweiß. Cussì al firmave i siei scrits. Une stele alpine, une anime nobile e blancje, un om di passions e di cognossincis, dadis, regaladis al Friûl e ai furlans cun elegance di artist e di inteletuâl. Renzo Balzan, classe 1943, nassût a Felet di Tavagnà e trasferît tor dai vincj agns in Cjargne, a Tierç di Tumieç, precisementri tal 1966. Nus à lassâts ai 8 di Novembar, ae etât di 73 agns. Cul dûl e il displasê di ducj, in particolâr de comunitât culturâl furlane, che e viôt a mancjâ une figure esemplâr. Une persone di tignî cont, come dut ce che nus à lassât e che nô o vin ereditât.
Gjornalist e scritôr, poete e contestoriis, condutôr di trasmissions televisivis, fondadôr di rivistis e di boletins, la opare di Renzo Balzan e je sostanziose e e cjape dentri une vore di lengaçs e di formis. Siore la sô produzion leterarie, che lu fâs un dai scritôrs plui produtîfs de Cjargne. Cjargnel no di nassite ma di adozion. «Di sintiments», come che i plaseve dî. Grant passionât di lenghe, culture e tradizions furlanis, al à publicât vincj libris, di poesiis, contis, cronichis, editoriâi.
Vôs storiche, ideadôr e condutôr dal program “Cuintri Cjargne – un spazi di informazion e culture inte nestre lenghe”, che al lave in onde sul canâl televisîf Tele Alto Bût di Paluce, i siei intervents, simpri elegants e lucits, a tignivin cont di tantis robis che a sucedevin in Friûl, cun aprofondiments simpri une vore interessants e incisîfs. Politiche, teritori, storie, lavôr, culture, socialitât, identitât, slambris di vite furlane, la sô militance in tal mont dal gjornalisim e je tacade firmant la riviste Gnovis Pagjinis Furlanis, par cure de Union Scritôrs Furlans. Intal 1998 al à fondât il periodic mensîl Ladins dal Friûl, publicât sedi inte version di cjarte sedi on-line, sul sît internet www.ladinsdalfriul.org, par cure de associazion Cjargne Culture. Un grant cjapitul de sô vite che al merete pardabon di scuvierzi.
La sô pene, une vore vivarose, le à regalade a cetantis testadis furlanis, ancje a nô di La Patrie dal Friûl, ma no dome: Radio Onde Furlane, La Vita Cattolica, Il Friuli, Int Furlane, In Uaite, Macchie, Asout Geats, L’Alto Adige di Bolzan, l’Agenda Friulana, publicade dal editôr Chiandetti, lis principâls. Ricercjadôr mai strac e fintremai insegnant, a partî dal an academic 1999/2000 al à tignût, te Universitât de Tierce Etât de Cjargne, il cors di Lenghe e Leterature Ladine Furlane e al à curade la publicazion de golaine dai Quaderni di Cultura Carnica / Cuaders di Culture Cjargnele, editâts de stesse UTE.
Membri de Union Scritôrs Furlans a partî dal 2004, la sô produzion si fâs tacâ dal 1984 cul libri Liendis de Cjargne e dai contors, par fermâsi intal 2014 cun Tradizions e usancis tal timp di Pasche maiôr. Intal mieç, antologjiis poetichis, contis, saçs, traduzions, come pe comedie Tailleur pour dames di Georges Feydeau, diviers Sonets di William Shakespeare, il drame storic Egmont di Johann Wolfgang Goethe, insiemi a Sergio Fantini.
La sô vene poetiche, plene di spessôr, lu à puartât a vinci intal 1983 il premi S. Simon e intal 1987 il Premi Friûl inte sezion des contis. Come scritôr, promotôr de culture furlane e figure di grande rilevance tal mantignî vîfs i contats cu la comunitât ladine des Dolomitis, Renzo Balzan intal 1993 al à ricevût il premi Nadâl furlan. Un furlan di ringraciâ e di no dismenteâ mai. ❚
✒ Alessio Screm