Targhe Tenco a Claudia Crabuzza, cjantante sarde in lenghe catalane

Claudia Crabuzza, cjantante sarde in lenghe catalane di Alghero, e à vinçût la Targhe Tenco inte sezion Dialets talians e lenghis minoritariis. Il premi al è il plui prestigjôs tal cjamp de musiche taliane. Inte classifiche dal miôr album al à vinçût Niccolò Fabi cun Una somma di piccole cose.
La Targhe Tenco i vignarà dade a Claudia pal disc par catalan algherês Com un soldat, ex aequo cun O sanghe, di James Senese & Napoli Centrale. Doi agns indaûr chel stes ricognossiment lu cjapave il furlan Loris Vescovo cul so disc Penisolâti.
Autore e cjantautore, e je nassude e e je a stâ a Alghero. A partî dal 2000 e fâs part dai Chichimeca, che si son esibîts tantis voltis par dute Italia, in Catalogne, in Austrie.
Insiemi ae ghitariste classiche Caterinangela Fadda a matin dongje il duo Violeta Azul, un omaç ai autôrs de gnove cjançon mericane. La cubie e vinç il Premi Maria Carta intal 2010.
Intal 2012 e prodûs, cul cjantant Claudio Gabriel Sanna dai Calic, il cd Un home del paìs, li che a tornin a interpretâ lis cjançons dal algherês Pino Piras, muart intal 1989. Propit cuntun toc di chest disc a vincin il premi Suns 2012 a Udin, tant che pe cjançon che pe interpretazion miôr.
L’amôr pe so tiere Claudia no lu pant dome cu la musiche: di cualchi an e à vierzût La Botteghina, une piçule cusine di pize segnalade di Slow Food, li che e dopre dome prodots di stagjon che a vegnin di piçulis produzions di cualitât dal teritori. ❚
✒ Redazion