IL PERSONAÇ STORIC. Nicolau di Manià /

Nicolau di Manià (1423 – 1485), architet, matematic e inzegnîr, al progjete un sisteme di canâi che a puartaran la aghe dal Celine fin dentri le vile di Davian, colegantsi cul Nunciel par traspuartâ lens fin dentri le citât di Pordenon. Al pensarà ancje a le realizazion di mulins e di fariis, che a saran la prime olme par une trasformazion in clâf protoindustriâl de drete dal Tiliment. Un so grant progjet, che lui si ere insumiât di fâ, e sarès stade le canalizazion da lis aghis de Ledre e dal Tiliment par podê dâi une gnove sburtade a la agriculture de plane furlane. Prime si è oponût il Senât di Vignesie, che probabilmentri al veve pôre di une cressite masse libare de Patrie; po dopo il progjet al è colât parcè che la comunitât di Glemone i à fat cuintri. Lavorant sui siei studis a rivaran a metilu in pîts dome che tal secul XIX. ❚
✒ Agnul Floramo