Lezions di Autonomie edizion 2017

A son partidis ai19 di Otubar dal mês passât lis gnovis Lezions di Autonomie, rivadis ae cuarte edizion e pensadis e realizadis di un grup di sindics furlans cun diviersis realtâts dal mont autonomistic come La Grame di Merêt di Tombe, il moviment Glesie Furlane, il nestri gjornâl La Patrie dal Friûl, Radio Onde Furlane e, pe prime volte chest an, cul supuart de Universitât dal Friûl e dal ANCI. Dopo dal referendum costituzionâl dai 4 di Dicembar, che al passi il SI o che al vinci il NO, la aministrazion regjonâl e varà di meti man al Statût, par altri za modificât pôc timp fa dal Stât Talian in forme unilaterâl. «O pensìn – a an spiegât i promotôrs – che e sedi la ocasion juste par riviodi su gnovis fondis il dirit a la autonomie di chestis comunitâts e par contratâ cul Stât gnovis competencis, la scuele in primis, ma soredut rapuarts finanziaris clârs. Une tratative duncje cruciâl che e rive intun moment critic, dulà che a somein cjapà pît tindincis neo-centralistis in non dal eficientisim economic e aministratîf ».
E propit di chescj temis a si è tacât a fevelâ tal prin incuintri Autonomie economiche e autonomie politiche-aministrative che al à viodût la partecipazion di Roberto Louvin, professôr di Dirit public comparât de Universitât de Calabrie, clamât a contâ Il model de Valle d’Aosta-Vallée d’Aoste. Cun lui presints a dibati, introdots di Massimo Moretuzzo – Sindic di Merêt di Tombe – Elena D’Orlando, delegade dal Retôr de Universitât dal Friûl, Mario Pezzetta President ANCI F-VG e Elisabetta Basso, presidente de associazion culturâl La Grame. «No dome lis minorancis linguistichis ma il stes decentrament al è sot atac – al à det Louvin – al sta vegnint indevant un gnûf centralisim ».
O vin bisugne di fâ capî che la autonomie speciâl no dome no je sorpassade ma che e rapresente la suste par un vêr disvilup des comunitâts regjonâls che propit cul decentrament a àn savût risolvi tancj problemis, par esempli la ricostruzion post taramot dal 1976.
Il dirit a la autonomie si fonde dal sigûr su la presince tal teritori des trê minorancis linguistichis, chê todescje, chê slovene e chê furlane. Une tutele che massime pe minorance furlane e je rivade cun 50 agns di ritart e no dal dut aplicade. Baste pensâ ae presince dal furlan te scuele.
Di chest si à rasonât tal secont apontament, chel dai 27 di Otubar, une taule taronde moderade di Mauro Pascolini de Universitât dal Friûl, cun Federico Vicario, Adriana Janežič – SLORI, Alfredo Sandrini, President dal Kanaltaler Kulturverein, Walter Tomada de ARLeF e Marco Stolfo di MuMUCEI e Universitât dal Friûl.
Lis lezions di Autonomie a tornin Joibe ai 3 di Novembar, simpri in Sala Florio, vie Palladio 8, Udin, da lis 18.00 aes 20.00, cun l’incuintri Competence primarie te istruzion. Al presente Andrea De Nicolo, Sindic di Prissinins e cu lui Bruno Forte ex dirigjent scolastic e Ivano Strizzolo President de Comission paritetiche Stât-Regjon.
Joibe ai 10 di Novembar da lis 18.00 aes 20.00 spazi a Union europeane e dirits de minorancis linguistichis te esperience dal Alto Adige-Südtirol, al presente Ennio Scridel, Sindic di Flumisel. Presints Esther Happacher Professôr di Dirit costituzionâl talian e di Dirit de autonomie te Universitât di Innsbruck e Alessandro Carrozzo Serling soc. coop.
Ultim apontament Joibe ai 17 di Novembar da lis 18.00 aes 20.00 Valôr e impat economic de lenghe euskera, al presente Markus Maurmair, Sindic di Voleson Darzin. Presints Patxi Baztarrika Viceconseîr pe politiche linguistiche, educazion e culture dal Guvier Autonim basc; William Cisilino diretôr de ARLeF. Lis Conclusions a saran di Alberto De Toni Retôr de Universitât dal Friûl. ❚
✒ David Zanirato