NO PAR FURLAN… MA BOGNS. Un libri su la politiche e lis politichis te Regjon Friûl-VJ | “Enfestar”, cjants e bai tra il folk e Tom Waits

Un libri su la politiche e lis politichis te Regjon Friûl-VJ
Pai cincuante agns de ativitât dal Consei regjonâl de Regjon autonome Friûl-VJ e pai cuarante agns dal taramot in Friûl e je stade dade fûr une racuelte di saçs su la ativitât dal “parlament” de Regjon che e ten dongje la plui part dal Friûl cun Triest e su la politiche e lis politichis de Regjon e te regjon.
Il libri, par cure dal politolic Marco Cucchini, si clame “Politica e politiche dell’autonomia”. Propit Cucchini al vierç cuntun cjapitul dedicât al Consei regjonâl tant che «cûr de autonomie». Plui indenant si fevele di partîts (Štefan Čok), di sistemis eletorâi (Fabrizio Petrucco), di elezions e comunicazion (Alberto Vanin), di rapuarts tra il Consei e lis Zontis (Francesco Saraceno), di produzion legjislative e regolamentâr (Davide Soto Naranjo) e di politiche internazionâl (Maria Cristina Novello), intant che Igor Londero al firme un biel contribût sul taramot e Franco Zubin al tire lis conclusions.
Il volum al è siôr di dâts e di informazions. Cundut achel e je ancje cualchi mancjance: lis specificitâts di Verts e Dp a varessin meretât almancul dôs riis e la part sul autonomisim furlan e somee masse strucade.
M. Cucchini (cur.), “Politica e politiche dell’autonomia”, Forum, Udin, 2016. ❚ (Marco Stolfo)
“Enfestar”, cjants e bai tra il folk e Tom Waits
Blu l’Azard al è un grup di cuatri musiciscj des valadis francoprovençâls e ocitanis dal Piemont. Sù par jù un an indaûr al à dât fût il so prin disc: une racuelte di tocs che a pescjin tes tradizion di lenti là e di chês altris tieris d’Òc e di Arpitanie, de Gascogne ae Savoie.
Une leture no convenzionâl di cjants e bâi, là che vôs, violin e armoniche si incrosin cul sax e il clarinet. Une misture sauride che e sa di folk e di Tom Waits cun tescj par ocitan, par francês, par  francoprovençâl e par talian. Infos in rêt: www.chambradoc.it/BlulAzard.page.
Blu l’Azard, “Enfestar”, cd Chambra d’Òc, 2015. ❚(M.S.)