(L)INT FURLANE. Se si studin i Fogolârs

✽✽ La notizie no somee che e vedi sveât particolâr atenzion di stes la sierade des sedis dai Fogolârs furlans di Caracas e Sant Cristobal in Venezuela al varès di impressionâus cun fuarce. Prin parcè che segnâl de grave crisi economiche che e je daûr a colpî il paîs Sud american e di consecuence chei 15mil  conazionâi emigrâts là jù, e in secont lûc stant che, cu la sierade di chescj doi ponts di riferiment, a mancjin dôs colonis di une assistence materiâl e morâl pussibile.
✽✽ In tancj si visaran che intune situazion simile, la crisi argjentine, l’Ente Friuli nel Mondo si è impegnât daurman cuntune schirie di iniziativis a pro des fameis emigradis, rivant a studiâ fintremai percors di studi e lavôr pe lôr tornade. A son stâts fats invistiments economics impuartants, a son stâts creâts canâi di finanziament regjonâl par chescj aiûts. I risultâts di chest impegn no si son mai pardabon cognossûts, a vuê no savìn se chê operazion si è sierade in maniere positive e se duncje si puedi tornâ a ripeti in altris situazions.
✽✽ Anzit propri l’impegn finanziari pe Argjentine al è stât ae fonde di critichis e suspiets, tant di incalmâ une polemiche che e à invistît i cjâfs de associazion e al è stât dispès rimpin par criticâ i criteris stes che si base la assistence ai nestris emigrants.
✽✽ Masse, si dîs, lis siglis. La contemporaneitât dai doi raduns estîfs, chel de Efasce, la organizazion fondade de Curie pordenonese, e di Friûl intal mont al à fat berlâ al scandul e ae straçarie di bêçs publics de bande de Regjon. L’ex president Pittaro, intal so intervent sul Messaggero Veneto, al à sclarît cemût che dispès sot dal acronim di une associazion si plati il vueit di iscrits e di iniziativis.
✽✽ La origjinalitât e il lavôr preziôs dai Fogolârs al è finît sot acuse, cuant che invezit a la stangje a varessin di lâ ducj chei che, partîts a cjâf, a àn volût doprâ i nestris emigrants tant che fontane di rapresentance politiche e di acès ai fonts regjonâi, creant struturis par nuie rapresentadis inte realtât. Une spartizion tipiche de prime republiche.
✽✽ Vuê il zûc si fâs plui sutîl e inte smire e sta la specificitât de organizazion fondade di Ottavio Valerio: l’obietîf, a chest pont justificât de crisi e dal caratar barufant des associazions, e je la creazion di un sôl riferiment regjonâl,  e viodût che al esist ancje un Giuliani nel mondo che al puedi ancje eliminâ chel tiermin “furlan” di cualsisei iniziative.
✽✽ E covente une rispueste ferme: il president di cumò nol pues fâ fente che chest nol sedi daûr a sucedi. Une iniziative concrete pal Venezuela e podarès jessi la ocasion par dimostrâ che la flame dai Fogolârs furlans no le stude nissun.❚
✒ Dree Valcic