Avôt dal Friûl. La Glesie mari di Aquilee nus invide ancje chest an a la solenitât dai Sants Ermacure e Furtunât

Domenie ai 17 di Lui aes 6 sore sere si cjatarìn a Aquilee pal Avôt dal Friûl in ocasion de ricorence dai Sants Ermacure e Fortunât, prin vescul di Aquilee e il so diacun, nestris Patrons. La messe e vignarà celebrade te Basiliche.
I predis di Glesie Furlane a celebraran la messe par furlan cun leturis par sloven e todesc.
Come ogni an e sarà ancje ocasion par cjatâsi, par fâ memorie dai Sants Ermacure e Fortunât, e par meti adun uns pocjis di riflessions, di struc, di ce che si à vût fat te suaze dal grop di Glesie Furlane e di ce che si à voie di podê fâ di chi a pôc. E sarà ancje la ocasion pe nestre redazion de La Patrie dal Friûl di incuintrâ i letôrs e resonâ su la situazion de nestre Tiere.
Un moment da pît de messe, duncje, par dâ sens a un avôt che al cjale ancje fûr de glesie.
Tignît di voli ancje il nestri sît (www.lapatriedalfriul.org) e la nestre pagjine Facebook La Patrie dal Friûl li che o comunicarìn ducj i particolârs de messe.
Partecipâ ogni an a Aquilee nol è dome un impuartant apontament liturgjic, ma al è vignî a zontâ un “got di vueli” ae lum de nestre identitât.
«Aquilee e je come un grant poç di aghe, là che plui si va in sot e plui glaçade e je la aghe. Chê aghe che e à ristorât la sêt di gjenerazions e gjenerazions. Come cu la aghe dal poç, cun Aquilee no si rive mai a dî dut, di tant feconde che e je cheste risultive. Aquilee e je come une miniere che si sprofonde tal timp e te tiere. Plui si va in dentri e plui si intivisi in tesaurs che no si cjatin di altris bandis. Cirìn, usgnot, di jentrâ spiritualmentri in cheste risultive di aghe vive e in cheste arcje di minerâi preziôs». (pre Antoni Beline, 2005) ❚
✒ Redazion