Sfuei Mensîl Furlan Indipendent
Archivi de Patrie

IL FERÂL. La mari spirituâl de Patrie

............

Ai 12 di lui di za 10 agns, propit il dì che il lunari nus regale la memorie dai Sants Ermacure e Fortunât, nus à lassâts Marie Del Fabbro, femine e compagne fedele tes batais passionadis pal Friûl di Felix Marchi. In chê ocasion pre Antoni, nol podeve fâ di mancul di ricuardâle, jê che cun Marchi lu vevin cjapât come fi d’anime e a lui i vevin consegnade la testade dal nestri gjornâl, sigûrs che lu varessin metût in buinis mans. Par ricuardâ Marie, che al è nestri dovê di ricognossince, o riproponìn il articul di pre Antoni, erêt spirituâl dal impegn culturâl, di autodeterminazions e cussientizazions a pro dai furlans di Marie e Felix insiemi cun pre Bepo Marchet. (pre Roman Michelot)
Se e ves podût sielzi la zornade par cumiatâsi di cheste tiere, no varès sielzût di miôr: l’albe dai dodis di lui, sagre dai sants Ermacure e Fortunât, fondadôrs e protetôrs di chest sflic benedet de braide di Diu. O stoi fevelant di Marie Del Fabbro, pe int di Mediis Marie di Place, parcè che dai barcons di cjase e sintive il scori legri de fontane e i glons resintins de gleseute di san Blâs, une perle dal 1500.
Marie e jere cognossude ancje come Marie Marchi, par vie dal om, Felix Marchi, che i passionâts des robis nostranis lu àn za metût tal firmament furlan come stele di prime grandece, ancje se apartade. E cun Marchi si slontanisi de Cjargne e si va tal cûr di Udin, in vie Marcjât Vieri, là che lui al comedave dincj e al progjetave une Patrie furlane sfrancjade di ogni baronie e autonome, par no dî indipendente. Di fat, sot dal titul dal setemanâl, al veve fat meti, in grant, chel di bessôi che al è stât bandonât masse a la svelte par critichis cence mani di int cence cjâf. «Il fat che no podin tornâ a metisi in pins di bessôi, nol vûl dî che no podin ministrâsi di bessôi» al à sclarît pre Checo Placerean intant dal taramot.
Ma tornìn a cheste femine fuarte e delicade, inteligjente e discrete, che e à puartât te mafie de vite citadine dut l’incjant des monts e dal cîl de Cjargne. A Udin e à cognossût Marchi, che al vignive de Cine, e cul timp si son volûts e maridâts, ancje se la distance di etât e jere grande: lui patriarcje espert di mont e jê une rose frescje di prât.Ma si son capîts, rispietâts, volûts ben e completâts. Jê e à cjapade part de sgrimie di lui e lui si è morestât a contat cun jê. A son deventâts viei in relative salût e sintiment. Lui al è muart dal 1986, a 97 agns, e jê e stave rivant a 94, di finîju ai 2 di Dicembar. Cumò a polsin insiemi te pâs di Soclêf e cu la benedizion che Diu al da ai siei fameis fedêi.
I furlans a son debit cun Marie e cun Felix par vie de Patrie dal Friûl e di une vite lungje di testemoneance coerente di amôr di patrie, di libertât, di vite. Un amôr profont e fuart, cence sentimentalisims e cence gnaulariis. Un amôr fat di fadie, di progjets, di batais, di displasês, come chel di ducj i profetis e testemonis che Diu nus mande. Dal 1946, in Fevrâr, al jes il prin numar dal gjornâl autonomistic. Al durarà fint ai prins agns ’50, cuant che pre  Bepo Marchet, l’alter ego di Marchi e il penâl plui brilant e spiçât dai autonomiscj, al srarissarà la sô colaborazion pai ricats di dutis lis fuarcis, politichis e religjosis. Come dutis lis robis artesanâls, al larà indenant come che al podarà e fin che al podarà.
Dal 1957 al 1965 lu à direzût Marie di Place. Di un trat di timp in ca, cu la stesse fedeltât e passion, ancje se cun mancul virtût e tun contest economic, politic e culturâl dut diferent, lu ai cjapât in man jo. E lu ai cjapât des mans di Felix e di Marie come che un fi al cjape des mans dai gjenitôrs une ereditât preziose. Parcè che lôr, di cuant che si sin intivâts la prime volte, mi àn tratât di fi e mi àn consegnât, come une relicuie, la testade dal sfuei e ancje dutis lis copiis jessudis fint in chel moment.
Prin di murî, in plene luciditât e serenitât, e à volût lassâmi il ritrat a vueli dal so om, par che o tegni vive la sô memorie e impiade la lum de libertât e de identitât furlane.
Il Signôr i à parût di no indalegrâ il lôr fogolâr cuntune creature, ma la lôr vite no je stade sterpe. Parcè che ogni bon furlan al po ritignîsi fi e erêt di cheste copie straordenarie e Marie e po tignîsi in bon de sô maternitât spirituâl.
(pre Antoni Beline, La Vita Cattolica dai 22 di Lui 2006) ❚

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +