SIMPRI BOGNS. Diego Franzolini, Gotis ta lidrîs, Udin, 1990

“Tra la jarbe maronzine di rivài e agadòris / al è plen di violutis e pestelàcs. / Pomârs e zariesârs in floridure ‘e piturin la / campagne di ovate blancje e rose fra qualchi / pinelàde di vêrt dal formènt ben petenât. / Tal serèn, tendis blancjs sparnizzadis ‘e fâsin / vetrinis di monz e di mâr”.
Cussì e scomence la jentrade, poesie che e vierç cheste racuelte di un centenâr di pagjinis, inricjide di une presentazion di Domeni Zanier e di vot dissens di Mario Snaidero.
Poesie une vore musicâl chê di Franzolini, tant al è vêr che cualchidune des sôs composizions e je stade metude in musiche (e intal libri o cjatin ancje i spartîts): La spassizade e Une vilote di sere di Albino Perosa, Une vite di Donatella Cantarutti La cjantade dal borc Vilalte di Oreste Rosso.
Il libri si divît in dôs sezions.
La prime Aiar di paîs, e je plui lizere, e fâs pensâ un pôc a Pieri Çorut: contemplazion de nature, poesiis di ocasion (gnocis di aur, il milenari di Udin, ostariis preseadis), Nadâl, Carnevâl e v.i. Par chel che al inten la forme, il poete al à une preference pal viers otonari (no simpri perfet, pe veretât), che i da ae pagjine chel savôr di musiche cussì plasevul. E si siere cu la biele imagjin dal contadin che, impen de aghe sante, al tocje la man intal so sudôr.
La seconde part Peraule pelegrine e je plui intimistiche, e sgjave plui a fonts intai sintiments. La note dominante e somee chê de nostalgjie par un Friûl che nol è plui chel di une volte e ancje pai furlans che no son plui (Il rosâr di gno pari, Dome jê). E il libri si siere cuntune altre biele imagjin: une mieze cocule che e fâs fente di sei une nâf e che e va vie sul roiuts, soflade dal cûr content dal poete-frut.
Franzolini, inte sô vite lavorative, al è stât un tecnic di implants industriâi, no dal sigûr un leterât. Epûr al à savût coltivâ cheste passion pe poesie, pe culture, pe storie (intal 2015 al à dât fûr un libri su la vicende dai cosacs in Friûl).
Un biel esempli! ❚
✒ Laurin Zuan Nardin