UTI dopo la sentence dal Tar. La telenovela e va indevant

E sta deventant une sorte di telenovela a pontadis la partide des UTI in Friûl-Vignesie Julie. Tes setemanis passadis, ducj a spietavin lis motivazions de sentence dal Tribunâl aministratîf regjonâl sui ricors presentâts dai 56 sindics contraris fin dal principi ae riforme des gnovis Unions teritoriâls intercomunâls.
Ancje in chest câs, come in dute la liende, lis reazions des dôs scuadris in bataie a son stadis contraditoriis. La Regjon, cul assessôr aes autonomiis locâls Paolo Panontin, e à esultât pal fat che il TAR al à declarâts inamissibii i ricors presentâts dai Comuns e de Provincie di Udin. Ma di chê altre bande, i sindics a son petâts sù svintulant l’acet dal ricors cuintri i comissariaments in câs di mancjade adozion dai statûts: il riferiment al è a chês UTI (Udin, Tarvis, Codroip, Cividât, Sacîl e Glemone) dulà che si à votât cul aval dal comissari, sclarint duncje che la regjon no pues sostituîsi ae volontât dai comuns. Fuart di cheste sentence, il grup di sindics “libars” – cemût che si son clamâts in chescj mês di vuere judiziarie – a son tornâts a bati casse denant de Zonte Serracchiani, rivant, al somearès, a gjavâ fûr un impegn scrit a modificâ (pe enesime volte) la leç numar 3 dal 2016, chê che e à costituidis lis UTI e che inizialmentri e veve inserît penalizazions finanziariis par chei comuns che no aderivin aes Unions. L’acuardi al è stât firmât de presidente, dal assessôr Panontin e di une delegazion dai sindics de ANCI. In sostance, al previôt che la cancelazion dal font perecuatîf  2016 e ristabilirès lis cundizions di colaborazion leâl tra istituzions e e costituirès il supuest par mantegni viert il dialic. Cun di plui, oltri a fâ colâ la obligatorietât de adesion e la penalizazion finanziarie, si ridusin ancje lis funzions obligatoriis che i comuns a dovevin cedi aes Unions, vâl a dî il principi di justece.
Naturalmentri dut al dovarà passâ in consei regjonâl pe aprovazion definitive, ma nol è di dâ dut par scontât, parcè che no ducj i sindics che a àn fat ricors al TAR a àn gradît l’acuardi, cussì come diviers conseîrs regjonâi de oposizion che a lamentin il fat de eliminazion dome parziâl des penalizazions, valevule dome pal 2016. La storie e continue… ❚
✒ David Zanirato