Incuintri cui insegnants de Liste regjonâl dai docents di furlan. Fontanini: «Che tu cressis marilenghe»

Il mês stât si è davuelt inte sede de Provincie di Udin un incuintri cui insegnants che a son inte Liste regjonâl dai docents di furlan. La “liste” e je fate di un grup di insegnants des scuelis maternis, elementârs, mediis e superiôrs, li che si specifichin i titui che a àn i diviers docents, cjapant dentri ancje la partecipazion a cors di perfezionament-master ricognossûts in maniere formâl.
In cheste schirie (1.576 presints ai 28 di Avrîl dal 2016) si podaran viodi i diviers curriculum e cui che al à davuelt la ativitât di inzornament. Un pas impuartant, parcè che la liste gjenerâl di prime e jere alfabetiche, cun dome chei che a vevin i recuisîts di fonde.
Un prin pont di partence par viodi ricognossût il percors formatîf ai insegnants. Une altre novitât impuartante e je la definizion de propueste di aciertâ la preparazion dai docents de liste invezit che afidâsi ae autocertificazion (si fâs cussì pai mestris di lenghis forestis) par garantî plui cualitât. E viodarà di fâlu une Comission regjonâl preponude e dal Ufici scolastic regjonâl (che al fâs riferiment al Miur).
Il president de Provincie di Udin Pietro Fontanini al à volût l’incuintri par marcâ la impuartance di «Une iniziative impuartante, viodude la rilevance de scuele inte politiche linguistiche di tutele dal furlan».
Vie pal apontament a son stâts consegnâts i atestâts di frecuence. «Che tu cressis marilenghe» al à augurât Fontanini, consegnant un regâl ai insegnants: la acuile simbul dal Friûl fate su sfuei di açâl inossidabil cuntun procediment di tai laser secont il model fat dai arlêfs dal Istitût Ceconi vuidâts des maestrancis de dite Minisini di Buie.
A ogni docent al è stât donât ancje il libri Trilogjie tormentade di pre Antoni Beline (ed. Glesie Furlane) e il segnelibri memoreatîf de figure dal Patriarcje Beltram.
Tra i inzornaments fats dai docents, di marcâ il cors Lenghe furlane te scuele plurilengâl, organizât de Universitât dal Friûl, che al à impegnât par 300 oris, dal Mai dal 2015 al Març dal 2016, uns sessante di lôr in ativitâts articoladis in lezions frontâls, laboratoris, seminaris e tirocinis.
Il diretôr dal cors Mauro Pascolini al pandût l’intindiment di organizânt altris cun contignûts setoriâi, pal aprofondiment di materiis specifichis. ❚
✒ Redazion