RICETE. Clafoutis di cjariesis

Timp pe preparazion: 10 minûts par preparâ e 55 minûts tal for
Ingredients par cuatri personis
3 ûfs, 100 gr di zucar, une steche di vanilie, 90 gr di farine, 200 gr di lat, une presute di sâl, 700 gr di cjariesis, 20 gr di brandy.
SI FASIN CUSSÌ
Un dai dolçs de tradizion francese, svelte e facile di preparâ, ideâl par sfrutâ lis cjariesis di stagjon (ma ancje armelins, ciespis, o baracocui di chei piçui).
Intune tortiere onte e infarinade si poin lis cjariesis taiadis a metât, cence il cuc, fin che si tapone dut il font. In bande si prepare la pastele, sbatint i ûfs cul zucar fin che si sglonfin ben, po dopo si zonte la farine passade tal tamês, il sâl, la vanilie (il dentri de steche o l’arome pront), e si va indenant a sbati, zontant plan lat e brandy, cence fâ smontâ l’impast, che al à di jessi biel sbrumôs. Si bute la pastele parsore des cjariesis, e si met tal for a 180° par 55 minûts, fin che e sarà biele dorade; dopo lassâ sclipî e guarnî cun zucar a vêl. La consistence e varâ di jessi plui chê di une omelette, che chê di une torte tradizionâl. ❚
Margherita Meggy Timeus