CJARGNE. La art floreâl di Nives Baldacconi

Nives Baldacconi di Vile di Cjargne e je di agns che si preste a vistî a fieste lis glesiis de Cjargne e no dome. E à fat tancj cors par imparâ une art vecjone, nassude in France tal 1300: chê floreâl. Po dopo, dutune cun pre Loris Della Pietra e à organizât in Cjargne cors floreâi. Nol è propit cussì sempliç meti rosis intes glesiis: al tocje tignî cont dai colôrs dal timp liturgjic di riferiment e cognossi il lôr significât. A Nadâl, par esempli, i colôrs a son il blanc – la puritât – il rose clâr de misericordie, il blu che al rapresente il misteri.
Par completâ cheste cognossince, Nives e je lade a scuele e ai prins di Avrîl, a 69 agns, si è laureade in teologjie. E conte: «O ai volût implenâ la mê interioritât e mi soi insiorade.»
Ma cemût mai la puarte de misericordie dal domo di Udin ise stade vistide a fieste di une cjargnele?
«Cuant che o soi lade li di pre Loris Della Pietra a viodi se al podeve deventâ il gno relatôr de tesi (dedicade ae simbologjie cristiane dal passâ la puarte), mi à dit che a Rome a vierzevin la Puarte Sante e in ogni diocesi dal Friûl si ‘nt varès vierte une. E cussì mi à domandât se o podevi viodi di chê dal domo di Udin. Mi tremavin lis gjambis pe responsabilitât e mi soi cjapade une setemane par pensâ.»
Un marangon al à fate la sacume di len e po dopo Nives e à studiât cemût meti lis rosis. Sù par jù 14 metris di cuvierzi: il vert al ven dai orts dai cjargnei e lis rosis di une buteghe di Udin. «Jo no soi da la idee di spindi a mone vie, parcè che la glesie in chest moment achì e varès di fâ alc altri e no robis par jemplâti i voi. Ma un segnâl come la Puarte parcè no? Il grup di lavôr al è fat di volontariis cjargnelis (Anna Novello, Sandra Concina, Maria Mazzolini, Nives Grassi e Roberta Zannier di Udin): al è un grup special! Cheste esperience e je une maniere par che ognidun di nô al meti in lûs i propris talents… Finide la zornade nus ven dentri une contentece uniche.»
Fate une puarte a ‘nd è altris che a spietin, e Nives e à di organizâsi pe comunion, pe fieste dai zaguts, pe Sense, pe Pasche des rosis, e v.i..
Mans che a rivin inmò a maraveâ, come che al cjante Gjigji Maieron cu lis peraulis di Celestino Vezzi: «Lis feminis cjargnelis a son dome mans… mans che si inzegnin si inzegnin da tant… dêts che ai cjale par ogni viers… mans gropolosis che si inzegnin distès»… ❚
✒ Marta Vezzi