NO SON PERAULIS PAR VECJOS. Apericena

Mandi nono!
Mandi frute, ti fermistu a cene chi di me? O fâs la polente cul lat!
Buine, nono, ma vuê propit no pues. O ai un aperitîf cui coscrits.
Ce probleme isal? Dopo dal aperitîf tu vegnis chi e o mangjìn insiemi.
No, nono, nol è propit un aperitîf, o fasìn un “apericena”.
Un aperice?
Un apericena, nono. Une vie di mieç tra l’aperitîf e une cene.
Ah, capît: come che al fâs Agnul, che ti dîs “ven a bevi alc chi di me” e dopo, tra pan, salam e formadi, tu vegnis fûr che tu âs bielzà cenât.
Une robe dal gjenar, si, però tal bar: tu tu cjolis di bevi e il bar ti ufrìs di mangjâ, cussì tu fâs l’aperitîf e intant tu cenis.
Une cene cul presit di un spritz? Ce isal, un bar o la Caritas?
Ben, ma il spritz tal fasin paiâ di plui. Tu pais un siet o dîs euros, secont dal bar dulà che tu vâs. E dopo no ti dan propite une cene, a son plui stuzighets: cualchi tartine, une torte salade, un pôc di rîs frêt…
Ah, benon: tu pais dîs euros par un spritz, e lôr ti metin il sâl tal dolç e no ti scjaldin nancje il rîs?
Ma nono, la torte salade no è un dolç, e il rîs frêt… bon, lassìn pierdi. Dut câs: il mangjâ nol è mâl, dome che nol è come une cene cjalde, servît in taule e dut. Si fâs a buffet.
Duncje: tu pais dîs euros un spritz, no ti servissin e tu mangjis frêt. Ma parcè si fasie une robe dal gjenar?
Ma, no sai: forsit parcè che al è mancul impegnatîf di une cene, tu puedis lâ vie cuant che tu âs voie. E dopo si fâs ancje par mode.
Une robe scomude e dispendiose che si fâs par mode? Fâmi induvinâ: le àno inventade i triestins, cheste “apericena”?
Par dî la veretât, o crôt che le vedin inventade i milanês. Sâstu, par viodisi subit dopo il lavôr, cence pierdi timp a lâ a cjase.
Ah, ben, se al è une robe par sparagnâ timp e lavorâ fin tal ultin, tu âs reson: sigûr no je robe par triestins. ❚
✒ Bete Di Spere