Mattarella pai 6 di Mai a Triest: lis protestis (sacrosantis!)

«Glemone e je la capitâl dal Taramot e chi al varès di vignî il President de Republiche ospit de sentade straordenarie dal Consei regjonâl, no a Triest».
Chest al è in struc il sens de letare che il President de Provincie di Udin, Fontanini al à scrit a Mattarella, che in ocasion dai cuarante agns dal taramot al sarà chi in Regjon pes celebrazions uficiâls, e che ben e rapresente lis protestis che si son jevadis cuintri di cheste decision..
Ai 6 di Mai al sarà un consei regjonâl straordenari come pai trente agns, ma a diference che dal 2006 cuant che la riunion e je stade fate a Glemone, pal moment i lavôrs a son previodûts a Triest.
Dopo dai finanziaments par ricuardâ la Fieste dal Friûl, Triest, che il sindic Cosolini al volarès fâ rivâ fin a Gurize, al continue a fâ azion di acentrament, cirint di “spostâ la storie” e puartant lis celebrazions pal aniversari dal Taramot, daûr dai plans de Presidente Serracchiani e la complicitât dai solits conseîrs regjonâls furlans, che dispès par pôre di pierdi la poltrone a son plui “triestins dai triestins”. No us aial bastât che te leç pe ricostruzion a fossin metûts dentri ancje i intervents pal centri di ricercje di Padrician? Almancul la memorie dai nestris muarts lassaitnusse in Friûl. ❚
✒ Christian Romanini