VIERS IL FRIÛL. Sapade In Friûl e môf un jespâr

Sot des Dolomitis dal Cjadovri al è dut un moviment. Lis ultimis gnovis su Sapade-Plodn che e sta rivant insom de scjalade par tornâ in Friûl – us vin contât tal numar passât de Patrie dal dopli vôt des Comissions Belanç e Afârs Costituzionâi dal Senât che a àn sblocadis lis ultimins rognis dal lungjissim iter burocratic – a àn discjadenât l’infier in Venit. Dal rest, si lu sta disint di agns in Cjanâl Grant a Vignesie tant che des bandis dal Belumat: se e scjampe Sapade, si riscje che al sdrumi jù dut il teritori de alte provincie di Belum, di Arabba a Cortine, scliçadis di une vite jenfri i privileçs “speciâi” dai  sudtirolês di une bande, e dai furlans di chê altre.
Dopo lis declarazions dai prins di Fevrâr dal Governadôr venit Luca Zaia, che al à cirût un ultin tentatîf di discoragjâ i sapadins disintjur che dut câs, lant in Friûl, lis robis par lôr no mioraressin, si è sintude ancje la vôs dal senatôr belumat dal Partît Democratic, Giovanni Piccoli, che al à presentât al Guvier une propueste di leç par imponi ae nestre Regjon di paiâ une specie di rimbors compensatîf a ducj chei comuns dal Venit, 28 in dut tra lis provinciis di Vignesie, Trevîs e Belum, che a confinin cul Friûl. Secont Piccoli, lis formis di autonomie che a gjoldin il Friûl e il Trentin-Sudtirôl a provochin un scuilibri fuart in chê fete di comuns sfrents tal mieç. In sostance, cualchi desene di milions di euros ad an, plui o mancul chei che lis provinciis di Trent e di Bolzan a dan pe ex leç Brancher. Par justificâ cheste propueste, Piccoli al à puartât a esempli la spese pro capite intes diviersis provinciis, cul Venit che al piert in medie 2 mil euros rispiet al Friûl e 6 mil euros rispiet al Sudtirôl.
«Balis» al à rispuindût l’ex conseîr regjonâl furlan, Giorgio Cavallo, ricuardant che chês cifris no tegnin cont dal fat che te nestre regjon si paìn la sanitât di bessôi.
Piccoli tal stes timp nol plate il vêr obietîf de sô propueste: «la operazion vere e je une altre, la creazion de macroregjon dal Nordest, o ben la aplicazion dal articul 132 de Costituzion che al previôt la fusion tra regjons». Il senatôr dal Pd no si è limitât dut câs a fâ une butade: tes setemanis passadis al à clamât adun a Longaron ducj i sindics dai teritoris belumats confinats cul Friûl che si son cjatâts dacuardi su pe propueste, spiegant che il prossim pas al sarà chel di coinvolzi la Regjon Venit e l’assessorât ai ents locâi, par rivâ insom a tratâ dret cu la nestre Regjon e la presidente Serracchiani. Nol reste cumò che spietâsi i sclariments in cjase dal partît di Renzi, pronts a verificâ che dut chest cancan nol seti verementri propedeutic pai dissens di Rome e chel famôs plan dal deputât Morassut… ❚
✒ David Zanirato