DI SCJAS IN SCJAS: I TARAMOTS INTE STORIE FURLANE. Introduzion aes pontadis

Che le Patrie dal Friûl e sedi simpri stade tiere di taramots lu savìn benon, magari cussì no! Plui voltis inte nestre storie l’Orcolat si è dismot de sô tane sgjavade inte lidrîs plui nere e profonde dal Friûl. Il prin a patî al è simpri stât il popul, il grant mut de Storie, chel che al reste fûr des cronichis, dai documents uficiâi. Chel stes popul che nol rive mai a vaî parsore dal disastri parcè che al vûl sparagnâ lis fuarcis par sgarfâ cun mans, dêts e ongulis par tirâsi fûr dai pastiei.
e alore, ve chi la sfide par chest gnûf percors che nus compagnarà dulinvie, inte nestre rubricute crevade e taramotade, pal 2016: cirî di capî cuâi che a son stâts i taramots che a àn scjassade la Patrie dal Friûl intai secui, cul sfuarç di slargjâ la considerazion a une indagjin che no sedi dome memorialistiche, ma pluitost storiche, antropologjiche, culturâl e ancje etiche, politiche. Dal moment che o sin plui che sigûrs che ogni volte che l’Orcul al è saltât fûr al à tirât sot dai siei pîts e sdrumât dut intîr il profîl di une ete, vierzint une gnove pussibilitât par ricostruî no dome lis cjasis, lis glesiis e i cjistiei, ma pluitost tocs di identitât, sclesis di progjets, une gnove cussience che di taramot in taramot nus à modelâts, secul par secul, par deventâ chel che o sin cumò.
il voli privilegjât al sarà clarementri pe int. Che e scombat ogni dì par vivi, che si rimpine ancje sui siums pûr di svindicâ il so dirit a esiti, a restâ salde ancje suntune tiere che e trimule. Cussì o larin a sgarfâ jenfri lis maseriis dal taramot dal 998, cuant che la basiliche di Acuilee e fo pestade in maniere gravissime par tornâ a nassi tant che icone di une identitât gnove par volontât di Popon; o viodarìn cemût che si viveve tal 1117, cuant che lis scjassadis a durarin par cuarante dîs, cjapant dentri la Patrie e i teritoris dai Siôrs de Carinzie; o scjamparìn a Udin cul patriarcje Bertolt di Andechs, che al bandone Cividât tal 1222, butât par tiere di une sgrifade orende dal Mostri: e al sarà dome il principi di une fin; o cirarìn di capî cemût che la societât furlane si è modificade tal profont tal 1278 e tal 1301, par colpe o a bon pro di doi scjas che a àn striçât insiemi dôs gjenerazions, une daûr di chê altre; si pierdarìn tal disastri dal 1348: salacor un dai plui pençs e teribii, cuant che paîs intîrs, fruçâts in polvar, no esistaran plui, scancelâts de storie par simpri, cun miârs di muarts e un Friûl che al cambie adiriture muse intal so paisaç naturâl e uman.
intrigants i taramots “umanistics” dal 1451, 1455, 1471, che a vegnin a completâ i disastris politics di Vignesie e de sô gose ’save e lare! Nol covente di sigûr spiegâ parcè che il 1511 al rapresente pardabon un ribalton, un laboratori cetant impuartant par rivâ a capî cierts moviments, no dome de tiere, ma de societât, comprendude la sô complicade anime plurâl. Ancje il Sietcent al è stât gjenerôs di tragjediis: secul di rivoluzions e di ben siet scjas, un secul che al treme, continuitât golose di investigâ, massime par une Cjargne colpide tant che e scugnarà scuvierzi une gnove vocazion economiche, in gracie de inteligjence dai tiessidôrs. E i sîs taramots dal Votcent, trê intal Friûl Imperiâl, chei altris tai teritoris sot de Italie, nus permetaran di meti in paragon dôs aministrazions, doi mûts diferents di considerâ lis “perifariis”. 1908, 1928 e 1936 a screin il secul passât, introdusint – par ordin – la Prime Vuere, il Fassisim e la Seconde Vuere Mondiâl. Gjeologjie e politiche. Tiere e culture. Une convivence di secui, chê dal Friûl e dai siei  tancj Orcolats. Cuasi la metafore di un destin incrosât e stramp, ancjemò dute di contâ! ❚
✒ Agnul Floramo