Lenghe furlane buine di pandi i concets plui alts de cognossince sientifiche. Il congrès anuâl de SSTeF lu à dimostrât

Ancje chest an, sabide ai 31 di Otubar, la Societât Sientifiche e Tecnologjiche Furlane (nassude dentri de Universitât dal Friûl) e à fate la sô Cunvigne anuâl, e a son cutuardis.
La SSTeF e je nassude di fat tal 2001 cun chê di promovi e di disvilupâ la ricercje, la cognossince e la divulgazion sientifiche e tecnologjiche doprant la lenghe furlane. Ancje se in dut il mont la comunicazion sientifiche si le fâs par inglês, pal insegnament e tai laboratoris di ricercje si doprin lis lenghis de comunitât nazionâl o locâl. E duncje ancje chi di nô, il disvilup de culture e de lenghe furlane al pues esisti dome se i aspiets plui impuartants de modernitât, tant a dî lis siencis, a vegnin considerâts par furlan. La dignitât e l’avignî di une lenghe si misurin su la sô capacitât di esprimi i concets plui alts de culture sientifiche e tecnologjiche de modernitât.
LA CUNVIGNE_ Dopo lis edizions passadis di Spilimberc, Cormons, Voleson e Gardiscje, il congrès al è tornât in Provincie di Udin e si è davuelt te Sale Feruglio dal Comun di Tavagnà, cun sede a Felet.
La Lectio Magistralis che le à vierzude, dopo dai salûts dal sindic dal Comun Maiarelli e de assessore ae culture Comuzzo, e je stade fate dal professôr Fausto Baldissera, innomenât rapresentant dal mont sientific di nivel internazionâl.
A son stadis sîs lis comunicazions sientifichis e i risultâts otignûts dai ricercjadôrs e tecnics furlans presentâts par furlan o par inglês: Miriam Pupini, Annamaria Vacri, Daniela Gnesutta cun “Lusoruts e cerots”, Rino Gubiani “Studi sui incidents in Friûl-Vignesie Julie: dai ex-voto aes statistichis di vuê”, Daniel Pittino “Personalitât dai leaders, spirt di imprese e prestazions tes piçulis organizazions”, Franco Rosa, Federico Nassivera, Michela Vesciaveo, Sandro Sillani, “Impuartance de lenghe furlane inte strategjie di marketing: un model SEM”, Franc Fari, Eric Pascoli “Neurosience dai siums e insiums dai vertebrâts” e Gianluca Gortani cun Nicola Serio a àn presentât “I scandais su l’artesanât”.
In fin, al è stât un dibatit par furlan (o di tant in tant par inglês) li che si à viodût che la lenghe furlane e pues jessi doprade par esprimi i concets plui alts de cognossince sientifiche. ❚ ✒ Redazion