Fontanini: “L’Ent, fin cuant che al sarà operatîf, al larà indevant a fâ la sô part”. Intal 2015 pal furlan 70 mil euros de Provincie

Chê su la lenghe furlane e je une ativitât capilâr tant difondude e impuartant che e contribuìs a mantignîle vive: avigniments teatrâi, racueltis di flabis e leturis par fruts, publicazions storichis, animazions pe scuele de infanzie. E ancjemò, intes cunvignis, intai apontaments musicâi e intai avigniments culturâi che tra chei si rimarche il premi leterari San Simon, il ricognossiment plui impuartant pe narative in marilenghe. A chescj a son indreçâts i contribûts che la Provincie di Udin e risierve ae promozion dal furlan. Un plafon chest an di 70 mil euros (fonts propris) assegnâts a une cincuantine di beneficiaris. “La Provincie di Udin – al sclarìs il president Pieri Fontanini – e rinove la poie aes ativitâts fatis o promovudis in lenghe, de storie, de culture furlane e des identitâts storichis. L’obietîf dai finanziaments al è dâ continuitât ae une vore di iniziativis organizadis intes nestris comunitâts; progjetualitât tant difondudis che a viodin impegnadis une vore di realtâts cul coinvolziment di cetantis personis, a conferme di trop che la lenghe e lis nestris tradizions a sedin sintudis de popolazion. L’Ent, fin cuant che al sarà operatîf, al larà indevant a fâ la sô part – al conclût– par sigurâ la prosecuzion di chestis ativitâts, risiervant une atenzion particolâr a chês indreçadis ai zovins, distintis di contignûts e modalitâts divulgativis inovativis. Mi auguri che ancjetant a fasin chês altris istituzions publichis: dome cuntun lavôr di scuadre, finalizât a promovi une sensibilitât comune, la marilenghe e varà un futûr”. ❚
Redazion