Il Festival de cjançon furlane al va a Nicole Lizzi

E je rivade sul palc dal Teatri Gnûf “Giovanni da Udine” discolce e cuntun vistidut vert, la vincidore de edizion 2015 dal Festival de cjançon furlane. Nicole Lizzi, 33 agns, di Feagne, e je stade une biele sorprese. La artiste e veve za partecipât a atris edizions dal concors, «e je une creature dal Festival» al à dit di jê il diretôr artistic Valter Sivilotti. Fintremai a cheste ocasion li che e à convinçût la jurie tecniche e il public cul toc “Viaç (still life)” pe «completece artistiche, cualitât di test, musiche, rangjaments e interpretazion». Il test al è sô e al fevele «dal viaç che ognidun al fâs te vite» nus sclarîs Lizzi «li che l’impuartant nol è là che si rive, ma savê che cuant che tu ti voltis indaûr tu puedis cjatâ le linie drete che tu âs lassade». Nicole e à un percors fat di tant studi par rivâ fin culì: di agns e cjape lezions di cjant e di musiche, che e dopre par scrivi lis sôs cjançons. E à un progjet di musiche pop acustic par inglês e par furlan cun Dario Di Lorenzo, che si clame “Sunrise”.
SIMPRI DOPRÂT IL FURLAN_Ancje pe lenghe, no je une “improvisade” come cualchi volte al sucêt (e no dome in chest concors), cul toc in marilenghe tirât fûr de sachete juste pe ocasion. «O ai simpri scrit par furlan, la mê lenghe di cjase, e che e sta une vore ben cu la musiche» e dîs. Une vitorie, duncje, ancje pe musiche in marilenghe che e conte cussì une vôs gnove. E la vitorie di une scuadre. La musiche e je di Stefano Ianne e i rangjaments a son di Jody Bortoluzzi. Po al è cui che al à lavorât daûr des cuintis par dut l’Istât prin di rivâ al apontament di Otubar: plui di 200 oris di laboratoris di tecniche vocâl e interpretative cu la mestre Franca Drioli, di presince seniche e teatrâl cul regjist Walter Mramor e cu la direzion musicâl di Sivilotti. «Mi fâs plasê ricuardâ che chest al è un lavôr simil a chel che al veve fat Don Gilberto Pressacco te prime edizion dal festival tai agns Cincuante» al conte il diretôr artistic. E i risultâts si viodin. In gracie de vuide di mans espertis, i artiscj a son rivâts preparâts al lôr grant moment. «In chê serade, o soi lade tal palc cu la emozion, sigûr, però mi soi sintude sigure di un lavôr madurît dì par dì» e dîs Nicole.
IL DOPO FESTIVAL_Duncje, une ocasion vignude fûr ben, cuntune jurie di lustri cun a cjâf la cjantautore Alice, cu la presince de Mittereuropa Orchestra e soredut cun diviersis cjançons di cualitât jenfri i 16 finaliscj (Ulisse Tonon al secont puest, Giordana Gismano al tierç). Se tal 2012 il festival al veve incoronade Claudia Grimaz, une sigurece, chest an al à scometût suntune zovine promesse. Ma dopo, ce sucedial a cui che al ven fûr di chi? Si studin i rifletôrs e ce restial di lôr? «O vin in progjet di fâ sunâ i tocs plui rapresentatîfs aes associazions bandistichis e corâls dal teritori, come che o vevin za fat te ultime edizion» al sclarîs Sivilotti «chest al è un mieç eficaç e no scontât di difusion, parcè che lis cjançons a jentrin dentri dal repertori des bandis e dai cors in forme ative». E par Nicole, forsit al è in program ancje alc di plui. Cun buine probabilitât, la sô cjançon e sarà puartade ator di Alice, che e à mostrât interès a interpretâle. E o sin sigûrs che se jê e dîs, e fâs, di buine furlane di adozion come che e je.
✽
Piçule storie dal Festival
Il Festival de cjançon furlane al nas tal 1959 a Pradaman, inte suaze dal parc di Vile Giacomelli. Daspò di une lungje polse, tai agns Otante la rassegne e torne par iniziative dai comuns dal “Aster Cultura – Noi Cultura”. Prossime edizion, se dut al va ben, tal 2017. (www.festivaldellacanzonefriulana.it). ❚
Natascia Gargano