FRIÛL EUROPE. Merkel, Hollande e la Europe cence unitât che e à pôre de diversitât

Chê de economie, chê des relazions cul rest dal mont, chê dal cambiament climatic e chê dai dispatriâts. A son lis cuatri cuistions di fonde che a tocjin la Europe che e je e soredut che a mostrin la Europe che e mancje. Vie pal ultim mês a àn vût plui rilevance soredut la seconde e la cuarte, che in tancj câs, a tacâ de Sirie e de Libie, a son une vore leadis une cun chê altre.
Ai 7 di Otubar chescj argoments a son stâts frontâts, cun solenitât, de bande de cancelire todescje Angela Merkel e dal president francês François Hollande, che si son presentâts in cubie alì dal Parlament european, compagn dai lôr predecessôrs Hemut Kohl e François Mitterand tal 1989. I doi a àn fevelât des crisis e des disfidis che la Europe e à denant di se, de necessitât  di mantignî e di rinfuartî la unitât europeane e dai principis e dai valôrs di fonde de Europe e de sô integrazion: pâs, justizie, democrazie, libertât e solidarietât e, insom, umanitât.
A pensâi ben al è ce che a cirin chei che a scjampin de fam e soredut de vuere e che a vegnin in Europe cun chê di cambiâ in miôr la lôr vite. Magari cussì no, al è ancje ce che a stentin a cjatâ, tra bariduris reâls e psicologjichis che a vegnin fatis sù dilunc vie di chê che e ven clamade «la vie balcaniche» e no dome alì. Merkel e Hollande a àn batût propit su chescj aspiets: cuintri dal populisim nazionalist, razist e antieuropeist che al cres un pôc in ducj i stât e a pro di un rilanç de azion de Comission europeane, in gjenerâl e cun riferiment specific a imigrâts e dispatriâts.
Al è dificil no cjatâsi in cunvigne cun chês peraulis, ma al è ancjemò plui facil marcâ cetantis contradizions che chês stessis a palesin. Cun di fat Merkel e Hollande a fevelin di Europe unide, ma no proponin nuie di gnûf e di inovatîf rispiet ae Europe dai Stâts di cumò, che propit par chel e je scjafoiade dai diviers nazionalisims.
Di une bande, a critichin la mancjance di cûr e di vision strategjiche di tancj lôr coleghis. Ma di chê altre a fasin sù par jù compagn ancje lôr, in particolâr il president francês, che in chê ocasion al à provât a rilançâ in clâf europeane la classiche ‘grandeur’ – forsit cence nancje rindisi cont che no so plui i timps di une ‘leadership’ francotodescje – e al à stigmatizât la politiche ongjarese al confin cu la Serbie, dismenteantsi che la France no à fat tant diferent tra Menton e Ventimiglia.
Al è chel stes Stât francês – e nol è un câs… – che al à une pôre mostre de diversitât linguistiche, là che ai 24 di Otubar tancj di lôr, de Bretane ae Ocitanie, dal Paîs Basc ae Corsiche, si àn dât adun in place in non des lenghis propriis e dai dirits. In chest sens Parîs al è in buine compagnie, stantche europeisim di façade, ipocrisie in cont di imigrâts e dispatriâts e mancjance di rispiet pes minorancis si cjatin ancje inaltrò.
Par esempli tal Stât talian, là che a Rome pe riforme dal servizi public radiotelevisîf si fâs fîs e fiastris tra lenghis e comunitâts e a Gurize si fâs fente di nuie denant des cundizions di tancj di lôr che a son incjampâts te jungle in bande dal Lusinç.
Intant che in Polonie la maiorance dal 51% di lôr che a son lâts a votâ i à dât il podê ai nazionaliscj conservadôrs di Prawo i Sprawieliwosc, che a prometin di «puartâ Budapest a Varsavie»… ❚
Marco Stolfo