ZODIAC FURLAN. Sgarpion

SGARPION
Nassûts jenfri i 23 di Otubar e i 22 di Novembar
Segn di tiere (nol è bon di nadâ)
Leture preferide: La pagjine dai muarts dal Messaggero
Il Sgarpion nol è il segn plui preseât dal zodiac.
Par esempli, ae domande “Cuâl isal il to animâl preferît?”, cualchidun al rispuindarà il gjat, cualchidun il cjan, i furlans soredut la vacje o il purcit. Nissun al ten particolarmentri in simpatie il puar sgarpion.
E insom, cemût no jessi dacuardi? Cu la sô nomee di jessi velenôs, il sgarpion al jeve simpri cualchi suspiet. Met che un sgarpion ti invidi a cene: “O ai preparât une robe di no crodi: mangjâ e murî!”. Nissun al larès tant vulintîr, no?
Ma il sgarpion furlan no si lasse butâ jù, parcè che come ducj i furlans, al sta ben ancje di bessôl. Dome che, jessint furlan, ancje il sgarpion, come ducj chei altris, al ten in cjase simpri cualchi salam, doi musets e cuatri butiliis di ufrî in câs che al vegni cualchidun a cjatâlu. E dal moment che a cjatâlu nol va mai nissun e che il furlan nol bute mai vie nuie, e ancjemò mancul se e je robe di mangjâ, al sgarpion i tocje mangjâ e bevi dut prime che al vadi di mâl.
Par chel, il sgarpion furlan al à dispès cualchi probleme cun chei nassûts sot dal segn de belance: no par une cuistion di compatibilitât di caratars, ma par pôre che chel de belance lu pesi e che al discuvierzi trop che al à parât jù.
Pal rest, il sgarpion al è timit, se nol è espansîf. Al è puartât pai studiis leteraris o ben par chei matematics. Al è un solitari, ma al pues jessi ancje tacât ae famee e ai amîs. Al è un lavoradôr, ma cualchi volte al è un sflacjon (dome se nol è 100% furlan, naturalmentri). In sumis: cualsisei persone che o cjatais o podês dîsi “Ah, tu âs propite il caratar dal sgarpion!”, e al larà ben.
Salût: No stait a becâsi di bessôi cul vuestri asei. No risolvarês ducj i problemis di salût, ma al è bielzà un bon principi.
Un consei: Bisugne cjapâ i uciei cuant che a passin (ce jentrial cul sgarpion? Nuie. Ma al è simpri un bon consei). ❚
Bete di Spere