Lis resons dal Pat

Il probleme al è chel de pierdite di ogni forme di sovranitât: chê politiche ma ancje chê economiche, che e ven svuedade di an in an de crisi ma ancje, magari cussì no, dal fat che i centris finanziaris si slontanin simpri plui dal teritori. Par chest, Moretuzzo e chei altris sindics dal Pat pe Autonomie a son une vore preocupâts de riforme dal sisteme des Bancjis di Credit Cooperatîf: “e je une riforme fondamentâl parcè che chescj istitûts di credit a restin la ultime forme finanziarie peade al teritori. In ce tiermins vignarano a mudâsi?”. La pôre e je che ancje par chestis realtâts piçulis ma impuartantonis che a stan dongje aes comunitâts il destin al sedi za scrit: e che a sedin destinadis a scjampâ ancje lôr inaltrò. “No volìn platâ che par int come nô che e fevele di democrazie partecipade e di prossimitât al è strani viodi une cuistion cussì leade al destin des nestris impresis e dai nestris citadins frontade tal cidinôr dai partîts e dai operadôrs economics. Nus plasarès invezit une discussion publiche su chest come su altris temis, tant che la gjestions dai bens comuns e dai servizis publics di rêt. O fevelarìn di chest cuntune schirie di intervents che o stin prontant pes setemanis che a vegnin”.
DISVILUP E CJADREIS_Fondis dal Pat a son il rispiet dal pluralisim linguistic e culturâl di cheste regjon (che e varès di pontâ a vê dal Stât competence primarie in materie di istruzion) e une idee di disvilup sostignibil che no si pues baratâ cun nissune cjadree. “Che o fasìni pôre si è viodût za des reazions che a son stadis ae presentazion dal nestri Pat: a son chei che a disin che no vin propuestis, altris che a cirin di strissinânus su lis lôr posizions. Ma la nestre idee e je chê di meti dongje i furlans intune aleance civiche e trasversâl. Sedi la çampe che la diestre taliane no bastin plui: par interpretâ il Friûl di doman bisugne partî dal teritori e des energjiis plui orientadis a difindi la identitât. Nol è un câs che za ae presentazion si son declarâts disponibii a vierzi une colaborazion intune otiche di difese de specialitât e de autonomie sedi il vicesindic di Drencje Michele Coren, vicesegretari de Union slovene, sedi Federico Simeoni, conseîr provinciâl di Patrie Furlane: ducj cussients che la situazion e je une vore grivie e che dome zontant lis  fuarcis si podarà evitâ di pierdi la autonomie e forsit ancje la Regjon.  ❚ ✒ W.T.