IL FERÂL. La muart dal just. Par memoreâ pre Renzo (viôt l’articul in prime pagjine) o publichìn chest articul di pre Toni, che al riflet su le muart

Intes vitis dai sants il moment plui alt al è chel de muart, che al à di coronâ in bielece une vite fûr dal ordenari. Une sorte di fûcs artificiâi.
No stoi a contâ chestis muarts edificantis, plenis di suspîrs, di visions, di premonizions, di lûs par ogni cjanton, cul sant o la sante in senton, seneôs di cjapâ il svual viers l’eternitât. Ancje pari Cesario al à volût edificânus contant di une muart sante capitade vie par Vicenze. Un contadin, cjamât di agns e di merits, sintint a svizinâsi la sô ore, al è jevât in senton e, cun chê pocje pivide che al veve, al à berlât: ”Viva il papa!” e al è spirât. Veramentri jo o crôt che un pari di famee al varès podût cumiatâsi dai siei fîs e nevôts che a contornavin il so jet cun alc di plui saurît.
O pensi che chestis pagjinis a servissin plui par inluminâ une ipotetiche santitât che par onorâ la veretât. E la veretât e je che la muart e fâs pôre a ducj, fûr che ai stupits. Ancje Crist, peât al Pari te eterne consustanzialitât e duncje simpri inluminât de glorie, al à sudât, vaiût e berlât.
Mi visi che une dì Modeste, la mari dal muini, classe 1905, e je lade a copâ un gjal. Mieg’ore dopo e je rivade dute sudade e sgrifignade. “Siôr plevan – mi à dit -, ch’al sinti ce che mi tocje! O soi lade a copâ il gjal come simpri e o ai crodût che mi sbilfàs. Mi faseve cuintri come un danât e nol voleve savênt di murî. Il mont si sta propit voltant cul cûl par aiar!”.
Se duncje lis bestiis a àn pôre di un fat naturâl, tant plui l’om, l’unic nemâl che al à cussience di jessi mortâl. E nol ten il fat di jessi plui o mancul bon o just. Parcè che nissun nol è vonde bon e sant denant dal Bon e dal Sant. “Puedial jessi mont un mortâl denant dal so creadôr? Ve, lui no si fide nancje dai siei fameis e ancje tai siei agnui al cjate pecjis” (Jp 4,17-18).
E je duncje la pôre di Diu e dal misteri e la voe di restâ di ca, ancje se intune val di lagrimis. Si pò alore acetâ la muart, rassegnâsi, frontâle miei che si pò, ma cence pratindi di saltâ di contentece. Ancje se un al è, o al riten, di jessi just. Al rivuart i ebreos a son tant plui concrets e umans di nô.
Il re David, cun dut che al jere un re seont il cûr di Diu, nol voleve murî e al à domandât la maniere di scapolâle. Un rabin i à dit: “Lei la Torah e tu vivarâs, parcè che la Torah, la leç di Diu, e je vite”. E David al leieve saldo la leç, cence fermâsi un lamp, par no murî. Ma la muart e veve di fâ il so cors e e à cjatade la sô strade. Une sere di sabide, che il re al jere plui intent di simpri te sô leture devote, pal barcon spalancât si à sintût un ucel che al cjantave cuntune vôs e une armonie mai sintude. Il re si è fermât un lamp e si è svicinât al barcon par viodi une creature cussì straordenarie. Al è bastât chel lamp di soste par che la muart lu brincàs e lu puartàs là che a son distinâts regnants e sotans.
Ancje par Abram e jere rivade l’ore. L’agnul de muart i va incuintri e j dîs: “Il Signôr mi à mandât a cjoliti”. “Puedial l’amì desiderâ la muart dal amì?” al proteste Abram. L’agnul de muart i rispuint cuntune domande: “Puedial l’inamorât no bramâ di vê simpri cun sè la persone amade?”. “Alore o ven” al rispuint Abram.
Mosè al stave par murî a 120 agns, ma l’anime no voleve bandonâ il cuarp di chel servidôr di Diu. Alore Diu si svicinà a Mosè e lu bussà te bocje. E cu la bocje i supà l’anime.  ❚
pre Antoni Beline