TERITORI – AUSTRIE. Il volontariât al è impuartant pe economie sociâl austriache

Il volontariât – par todesc «Freiwilligenarbeit» o, par tradizion, «Ehrenamt» – al è un lavôr libar e a gratis che si davuelç par motîfs di solidarietât, ma dispès si trate di ce che propit la peraule todescje nus sclarìs ben: «Ehre-» = onôr, ven a stâi che al puest dai bêçs si cjape onôr. I motîfs psicologjics a son diviers, te crisi atuâl il lavôr sociâl al ufrìs ancje prospetivis miôr tal mont dal lavôr. I dâts statistics austriacs a pandin un risultât clâr: i austriacs che a vivin tai grancj centris urbans – chest al vâl massime pai abitants di Viene – si interessin mancul al lavôr volontari. Intes regjons cuntune basse densitât di popolazion, il 48% des personis a davuelzin une ativitât volontarie, mintri che tes regjons cuntune alte densitât dome il 37%; po dopo, a Viene inmò mancul (35%). Te invisibilitât e tal anonimât de citât no tu cognossis il to vicin di cjase, inalore tu judarâs ancjemò mancul.
Il volontariât si definìs in Austrie tant che une ativitât libare che si davuelç cence paie, fûr dal nucli familiâr. Duncje, dut il lavôr cence paie dentri dai cuatri cjantons di cjase al è escludût: fûr il cuotidian des mamis e des feminis, fûr ancje il servizi militâr o civîl, o la semplice partignince a une associazion.
Si fevele di un lavôr volontari formâl tal câs di une ativitât inte suaze di une associazion o di une organizazion, p.e. i vigjii dal fûc. Informâl al è il «Nachbarschaftshilfe», vâl a dî il jutori sociâl al vicin, e dutis lis voris cence une suaze istituzionâl, tant che fâ spesis, fâ la braçule e v.i.
IL 44% DAI AUSTRIACS SORE I 15 AGNS AL À LAVORÂT A GRATIS IN CUALCHI FORME_ I numars (Statistik Austria 2008): il 44% dai austriacs sore i 15 agns al à lavorât a gratis in cualchi forme (formâl/informâl). Si trate duncje di sù par jù 3 milions di personis. Plui di mieç milion a dan une man te sfere de culture e dal timp libar; il stes numar al partecipe tal sport; subit daûr lis ativitâts dentri des organizazions de glesie (p.e. Caritas), o servizis di assistence o di urgjence.
Lant daûr de lôr nature, i oms a son plui presints tai servizis leâts al sport o ae assistence, ae urgjence, e al socors; lis feminis, tai contats sociâi mancul formâi. In medie, i volontaris a son atîfs cuasi 5 oris par setemane. I plui atîfs (50%) a son i scuelârs e i students, pôc mancul si fâs tal mont dal lavôr, une vore mancul i disocupâts e i pensionâts. Rivuart ae etât, i prins a son chei tra i 20 e i 24 agns e chei tra i 40 e i 59 agns; daspò dai 70, o vin un trend negatîf. La ativitât e dipint ancje dal grât di istruzion: i plui atîfs a son i laureâts. Parcè spindino il lôr timp libar? Pal 90% al è un plasê, un divertiment.
Il volontari tipic: om, 20-24 agns, laureât, impleât e cun fîs.
JANEZ ERAT