EDITORIÂL – Fûr des balis i partîts talianots

✽✽ Nancje che al fos rivât Obama, ma nancje di gnûf Renzi: e je bastade une ministre par tornâ a viodi a Udin lis trupis antisomosse talianis. La creazion in vie Glemone de zone rosse – chê fasse di sigurece par evitâ incidents che o sintìn dî cuant che si fâs il G7 – par evitâ che il svoletament des bandieris furlanis al conturbàs la viste dai esponents dai Pd, al berle ancjemò svindic, ma in fonts nus fâs plasê. Se une proteste pacifiche e devente la ocasion par inschiriâ lis trupis, al vûl dî che a àn pôre. Forsit no je la pôre, il sintiment just par descrivi ce che a pensin i sorestants atuâi dal moviment autonomist. Si trate pal moment di fastidi, un grues fastidi parcè che al met su la taule lis contradizions reâls de Regjon, al disturbe, fasintju savê e denunziantju, i plans devastants dal renzisim par ce che al tocje democrazie e autonomie.
✽✽ Une robe, di fat, al è sigurâ – cemût che e fâs la Serracchiani – che la specialitât no je in discussion, altri al è dimostrâ cemût che inte pratiche politiche dal guvier si sedi daûr a verificâ propit il contrari. Il mancjât inseriment dal furlan inte riforme de Rai al è dome che l’ultin esempli di cheste pratiche, rindût ancjemò plui grâf dal fat di vê refudadis ancje lis viertiduris pussibilis di esponents de stesse maiorance.
✽✽ La pussibilitât di un referendum su la creazion di dôs realtâts, Friûl e Triest, al scombussule i plans parcè che cuant che a jentrin in cjamp i citadins e no decidin lis segretariis dai partîts, il risultât nol è mai scontât.
✽✽ Il segnâl di ce che al podarès sucedi al devente, par lôr, ancjemò plui pericolôs dopo la bolade clamorose de Union tra i comuns di Daçan e Preusdomini: une burlade pal assessôr Panontin, l’ideadôr di chês Uti che a fasin svuacet dal Friûl. No par câs, pe lôr jentrade in funzion no je previodude nissune consultazion popolâr.
✽✽ Al clope il sisteme Serracchiani par un motîf sempliç: fâ vuê i interès dal Friûl, e ancje de Regjon, al va a pocâ cuintri lis strategjiis dal guvier e dai grups dominants.
✽✽ Nol è un câs che e nassi di cheste constatazion la decision di tancj sindics di dâ vite a chel “Pat pe autonomie” che vuê si presente tant che alternative reâl, che e nas dal bas, ae logjiche devastante de partitocrazie taliane.
✽✽ Nol è un câs che propit des unichis figuris istituzionâls eletis dal popul restadis su la sene, e partissi la clamade a fâ front comun par un gnûf Friûl. No chel che cun bandis e monuments si prepare a celebrâ l’aniversari dal cuarantesim dal taramot, ma chel des tendopolis, dai comitâts, de democrazie direte.
Un Friûl che al lote pai siei dirits, a cjâf alt e che al rît devant di dutis lis zonis rossis di une Italie cjapade dentri tai scandui e te coruzion.
Si movisi, lis iniziativis a son tantis, diviers cualchi volte ancje i protagoniscj, ma inte maiorance dai câs il desideri di unitât, la dibisugne di no ripeti i erôrs dal passât, di abandonâ personalisims inutii e grotescs, a àn la miôr su divisions e contrascj.
Al è dut câs alc di vigjilâ, vâl a dî l’abraç velenôs che ducj i partîts talians a tentaran mo cuntun mo cun chel altri dai moviments in cjamp. Si dopraran lis promessis, si riproponaran lis formazions ideologjichis. A fasaran di dut par dividi i furlans. No stin a colâ ancjemò une volte te vuate, mandìnju infin fûr des balis. ❚
Dree Valcic