CURTIS E CHE SI TOCJIN. Il Friûl al à finalmentri di decidi in autonomie dal so presint e dal so avignî

La crisi economiche e çoche fuart su lis aziendis produtivis dai diviers setôrs e sui nivei di ocupazion, e al rint simpri plui pesant il degrât de nestre mont. No si pues dâ il bon acet a decisions su dut chest, stant che a son stadis cjapadis cence o cuintri lis Rapresentancis istituzionâls e associativis dal Friûl.
Cussì, no podìn acetâ che i progjets – fats bogns bielzà cualchi àn indaûr – pal inmodernament des stradis ex statâls simpri plui ingolfadis dal grant trafic di vuê (vâl a dî di Sacîl a Udin, di Udin a Gurize, e di Udin a Tresesin) no sedin stâts finanziâts e metûts in vore ae svelte. Si dîs che no si àn i 280 milions di euros che a coventin. O rispuindìn che pal Friûl no son, ma par puartâ a bon fin la grande viabilitât triestine e la grande plateforme dal puart di Triest, il Guvier di Rome – tal zîr di un an – i bêçs ju à cjatâts… E si trate di ben 315 milions di euros!
Il stes discors lu fasìn cuintri lis decisions dal Guvier e de Regjon che a àn penalizât la Universitât dal Friûl, il Parc tecnologjic di Udin e la Fiere furlane de inovazion tecnologjiche des impresis.
Il cont al cres cul Coridôr european numar 5, che nol va indenant par vie che Triest e la Regjon a insistin suntun progjet di spese faraoniche: a varessin invezit di inmodernâ la ferade che bielzà e esist, cussì si rivarès in Slovenie no traviers il Cjars e Triest ma par Gurize e pe val dal Vipau, come che i Comitâts dai citadins, tancj Comuns e lis Provinciis di Gurize e di Udin a domandin di timp in ca.
Cussì no podìn nancje acetâ che al vegni «dismenteât» il Coridôr european «Adriatic Baltic», metût sù de Union europeane par unî i popui dal mâr Adriatic al mâr Baltic. Chest Coridôr al à di vê ancje lui une prioritât di atuazion, parcè che al garantirès un colegament miôr de Italie e dal Friûl cu la Europe di mieç e dal nord, e al valorizarès la nestre tiere passant su lis olmis de ferade Pontebane di Mestre a Pordenon, a Udin e a Tarvis.
Pal moment, l’ultin cantin lu dedichìn ae energjie eletriche a bon presit pal nestri sisteme produtîf, che e varès di rivâ de Austrie e de Slovenie. Purtrop, la indurance di Rome e di Triest a no volê intierâ lis conduturis de eletricitât e à blocât di fat di agns in ca cheste infrastruture impuartante pal Friûl, ancje se i Comitâts dai citadins, i Comuns e lis Provinciis furlanis le pensin te stesse maniere de Val Camoniche, in Lombardie, dulà che a àn decidût di fâ passâ sot tiere 160 km di eletrodots. Stesse indurance sbaliade de Regjon e di Rome si pant pe sigurece dal risi di inondazions dal Tiliment. Che si vûl otignî dome cu lis grandis «cassis di espansion» e no dantsi di fâ su dut il jet dal flum.
Curtis e che si tocjin inalore. Vuê il Friûl al è espropriât dal podê di decidi sul so presint e sul sô avignî. Par che il Friûl al puedi di gnûf autoguviernâsi, come une volte, i politics furlans di centri drete e di centri çampe che a son in maiorance tal Consei regjonâl a àn une sole cjosse di fâ. Aplicâ la leç sul decentrament regjonâl, tignî pe Regjon dome il podê legjislatîf gjenerâl e delegâ potestâts di atuazion, di funzions, di mieçs finanziaris e personâi ai Comuns e specialmentri ae Comunitât des Provinciis furlanis, che e rapresente la unitât istituzionâl dal Friûl e dal so popul.
ARNALT BARACÊT