ATUALITÂT – Un 3 di Avrîl cidin e platât in provincie di Pordenon

Trê di Avrîl, chest discognossût. Ancje chest an la fieste de Patrie dal Friûl e je passade, cidine cidine, te provincie di Pordenon. Pocjis bandieris tai barcons, fiestis uficiâls un pôc platadis (cualchi alc a è stât, come che o contìn in chel altri toc). «Parcè celebrâ une fieste che e ven di di là de aghe: noaltris o sin di Pordenon e no di Udin», si pense tai paîs di Pordenon viers il Venit.
ACUILIS FERMIS_ In chei altris paîs, plui dongje al Friûl centrâl, il sintiment furlanist al è plui fuart, ma distès no àn svolât tantis acuilis tal cîl ai 3 di Avrîl e tai dîs daspò. Un erôr che al vûl comedât daurman: no je storie di chei altris, il 3 di Avrîl al è ancje la storie dal teritori de provincie di Pordenon. In fin dai conts, se in cierts paîs si fevele venit, nol impuarte: a fasevin part dal Patriarcjât dal Friûl, vuê a puedin fevelâ la lenghe che a vuelin, ma no puedin dismenteâsi lis lôr lidrîs storichis. «Parcè cheste date?», e domande ancjemò chê int che no vûl propit savênt nuie dai 3 di Avrîl. Parcè che une date e à un valôr simbolic fuart, che al permet di identificâsi cuntun popul, une realtât, une nazion. La Provincie, tant che istituzion, e podarès jessi il sogjet che al promôf ancjemò di plui cheste celebrazion, dutune cu la Regjon.
SPORTEL ATÎF_ No stin a dismenteâsi che il sportel pal furlan te Provincie naoniane al è za atîf, e tal Zenâr passât al à organizade une cunvigne interessante su «Furlan e imigrazion: la lenghe tant che element di coesion e di integrazion culturâl». Parcè no spindi fuarcis e bêçs (no ‘nt coventin masse) par une valorizazion de storie furlane di cheste tiere? La firme dai 20 di Avrîl passâts tra la Provincie di Pordenon e chê di Udin pe valorizazion de lenghe furlane e fâs sperâ ben pal futûr. Dome cuntune date condividude, cuntune fieste par ducj, si pues jessi un sôl popul.
L’ESEMPLI FOREST_ Un esempli positîf al rive de Americhe. Il tierç lunis di Zenâr, ducj i Stâts Unîts a fiestezin il Martin Luther King Day, par ricuardâ lis oparis e la muart violente dal grant pastôr di colôr. Une volte cheste fieste no jere: dome che un grant grup di personis, fasint pressions, al à fat in mût che Ronald Reagan al firmàs tal 1983 la leç par meti in pîts la celebrazion. Cuntune date simbul, il moviment pai dirits de int di colôr al à podût cressi, otignî visibilitât e considerazion. Che no sedi ore di rivâ a cheste union ancje tal nestri Friûl?
Davide Francescutti