IL GRANT LUNARI DAL FRIÛL. Avost

IL SORELI, LA ATMOSFERE, LA NATURE
Tai prins dîs di Avost, il soreli si cjate a metât strade jenfri il solstizi di Jugn e l’ecuinozi di Setembar e e va indevant la sô corse aparint e in rive jù tal orizont, scurtant la durade dal dì e slungjant chê de gnot. Al condure il timp cjaldon, il scjafoiaç e la umiditât fin ae vignude des primis ploiis che a rinfrescjin e che a finissin di sglonfâ lis pomis pe lôr ultime maturazion prime des vendemis.
VORIS DAL CICLI AGRARI
Tal mês dal solion il contadin al pues polsâ, ancje se tai ultins dîs di Avost al pronte semplis, sintinis e cuinçs par jemplâju di aghe (une volte a vignivin sistemâts dilunc roiis e riui) par slargjâ lis dovis e cussì tornâ a dâur la lôr tignude perfete pai prossims mosts. Te cjanive si improntin ancje ducj i imprescj e i contignidôrs pes vendemis che a son dongje, che a van lavâts e netâts in maniere perfete. Tal zardin si tegnin di cont tapêts di jerbe ancje sigurant la umiditât costante, si tornin a plantâ piçui pomârs, si metin in ordin lis cisis ornamentâls. Grant lavôr su la mont cui arments tai ultins mês di cjampei, intant che sul mâr al va indevant la stagjon de pescje. Si fâs la racuelte des nolis. Tai orts lis feminis a semenin lidrics, salatis, latuiis, savôrs, rucule, ravanei, valeriane, spinazis, vuaìnis, fasûi nanui, cevolis e a tornin a plantâ lidric ros, indivie, verzis, brocui, fenoi e civole. ❚
Mario Martinis
RINGRAZIAMENT AL AUTÔR
Gjavât fûr di “Il grant lunari dal Friûl. Sants, fiestis e tradizions dal cicli dal an” (Pasian di Prât, 2012): o ringraziìn l’autôr pe disponibilitât e pe colaborazion ❚ ✒ Redazion