FRIÛL EUROPE. No son dome Grecie e confins. Il NPLD al propon une “road map” pes lenghis e pai dirits

La crisi de Grecie e chê che le clamin «emergjence imigrazion». A son zaromai un pôcs di mês che di ogni bande si sint e si lei che a son chescj i problemis de Europe. Però, plui che clamâju problemis, si varès di calcolâju tant che la manifestazion di un malstâ inmò plui profont che al tocje la Europe e la costruzion de sô (dis)Union. Cun di fat, di une bande il braç di fier in cont di debit e austeritât tra Comission europeane, Font monetari internazionâl e guvier grêc – che al moment di lâ in stampe no savìn ancjemò se e cemût che al rivarà a une conclusion – e di chê altre l’egoisim dai singui Stâts che a sierin confins e a tirin sù mûrs par fâi cuintri ai imigrâts e ai dispatriâts a palesin a fuart la mancjance de Europe, di chê Europe fondade su democrazie e solidarietât che e coventave za te prime part dal Nûfcent e che si à scomençât a fâle sù dopo de fin de Seconde vuere mondiâl.
E je une mancjance che e diven de stesse integrazion europeane, là che i Stâts, la economie e la finance a àn zuiât in chel istès sei tant che protagoniscj e motôrs che tant che ostacui e frens, che e conferme ancjemò di plui cetant che e covente a ducj une Europe pardabon unide e pardabon plurâl, là che a àn di vê plui valôr i dirits, lis personis, i teritoris, la citadinance ative e la partecipazion e mancul i podês, i interès e i vuadagns di pôcs di lôr.
In chest senari e cjape sù une cierte rilevance, cundut che no à nissune fuarce vincolante, la risoluzion in cont de paritât di gjenar fate buine dal Parlament european ai 9 di Jugn che e cjale in muse la realtât complesse des personis e des fameis inte Europe dal tierç mileni.
A proposit di Europe e di dirits – e in particolâr di dirits linguistics – cualchi setemane indaûr il president francês François Hollande al à tornât a fevelâ de sô volontât in cont de ratifiche de Cjarte europeane des lenghis regjonâls o minoritariis. De Corsiche ae Bretagne e de Alsazie ae Ocitane la gnove e je stade cjapade sù cun interès e atenzion, ma ancjemò di plui cun cautele e cun suspiet. Une solecitazion par che lis istituzions francesis e chês talianis a rivin pardabon ae ratifiche de Cjarte dal Consei de Europe (CdE) e je rivade ancje de bande de Assemblee gjenerâl dal NPDL, la Rêt pe promozion de diversitât linguistiche, che si à dade adun a Helsinki dai 11 ai 13 di Jugn. In chê ocasion, dongje dal rinovament dai siei vertiçs istituzionâi, cu la elezion ae presidence dal basc Patxi Baztarrika, il Network al à tornât a bati su la necessitât che lis istituzions continentâls si visin che plurilinguisim e tutele des minorancis a son une risorse e un obietîf de Europe e che si movin propit in reson di chel cuntune azion strategjiche, lant daûr di chê “Road Map 2020” che il NPDL al è daûr a meti adun cun chê di presentâle ae UE e al CdE dentri de Sierade di chest an. ❚
Marco Stolfo