ZODIAC FURLAN. Gjambar

Nassûts jenfri i 22 di Jugn e i 22 di Lui

Segn di Tiere, ancje se un pôc bagnade.

Dì dal an sfortunât: il prin di Mai (no si lavore)

Prime di dut: te astrologjie taliane, il “cancro” al è un granç, in chê furlane un gjambar.
Parcè po? La plui grande diference jenfri un granç e un gjambar e je che il granç al cjamine lant in bande, il gjambar par ledrôs.
In struc: i furlans nassûts tal segn dal gjambar a son normalmentri plui ledrôs di chei altris. No propite int di clamâ par passâ une serade legre in compagnie.
Cun di plui, la prime carateristiche di ducj i gjambars, furlans e no furlans, e je chê di vê intor come un scus, une corace che ju fâs deventâ plui sierâts e difidents viers il mont.
Duncje, il gjambar furlan al à il scus che a àn ducj i furlans, cun parsore il scus che a àn ducj i gjambars. Par rivâ a cjapâ confidence cuntun gjambar furlan a vuelin doi trê agns (se al è un gjambar particolarmentri espansîf), e ancje dopo che tu sês deventât so amì, no sta a maraveâti se ogni tant di bot no ti fevele plui.
Sot dal scus, il gjambar al è par solit une persone sensibile e plene di pinsîrs, che e resone un grum parsore di cualsisei monade. Il gjambar furlan no, invezit; lui nol à masse pinsîrs: al à une cjase parsore, come ducj i crustacis (e je ancje a prove di taramot!), e cuant che un furlan al à une cjase, o savìn ducj che no i covente altri.
In Friûl a son doi categoriis di gjambars: chei di mâr e chei di flum. Chei di mâr a son un tic mancul sierâts di caratar, ma cun chei di flum al ven fûr un altri probleme di difidence: stant propit dentri tal flum, no san mai cui considerâ “di ca” e cui “di là” da la aghe. Tal dubi, il gjambar di flum al fevele dome cun chei che a stan tal mieç come lui.
Mangjâ: Se us invidin a mangjâ un risot cul pes “tant bon che mai, mangjâ e murî”, lassait pierdi.
Salût: Ancje se o cjaminais par ledrôs, stait atents a dulà che o metês i pîts. Se no, in plui che ledrôs, o cjaminarês ancje çuets.❚
Bete di Spere