SPECIÂL – Sagre, solidarietât paisane

La sagre e nas lontan tal timp come fieste religjose, dulà che sul sagrât si celebrave il Sant che al jere dedicât ae glesie. Di cheste fieste religjose aromai al è restât ben pôc, lis sagris di cumò a son tant che marcjâts e dal spirt origjinari a son restadis pocjis olmis.
SACRI E PROFAN_ Cjalant indaûr però si pues rivâ a pensâ che lis sagris a son stadis une des primis manifestazions di solidarietât, un lûc dulà che un paîs si cjatave e dulà che al lavorave insieme par une finalitât a pro de comunitât. Cheste fieste de glesie, chest ringraziament religjôs di un paîs viers il propri patron, al durà plui o mancul fin subit dopo de seconde vuere dal secul passât. Po dopo cul rivâ dal benstâ e de cressite economiche, dongje dal sacri al fo metût il profan, il bancut dai prins marcjadants, i barachins che a vendevin vin e cualchi goloset. Nol jere nuie di mâl in chest, ancje parcè che la sagre cussì e deventave un moment di coinvolziment di une comunitât, un puest dulà che la int si cjatave par lavorâ insieme.
UN SOSTEGN_ Par solit in chei agns i beneficis che la sagre-marcjât e puartave a jerin destinâts a pro de comunitât, par oparis di solidarietât, par sostignî la glesie o par fâ dal ben a cui che al veve bisugne; al è propit cun chest spirt che in tancj paîs a son nassûts grups e comitâts par judâ e par sostignî variis iniziativis, o ancje lis «Pro Loco» par lavorâ in favôr de proprie comunitât.
MOMENT DI INTEGRAZION_ Ma lis sagris no jerin dome chest, a jerin ancje un moment di integrazion sociâl, di int che e lavorave dibant, che si meteve a disposizion, che no si tirave indaûr cuant che al jere di fâ alc. Zovins di buine volontât, anzians cun esperiencis, oms e feminis impegnâts: daûr des sagris si podeve simpri viodi chel che al jere il spirt paisan e de partignince a di une comunitât.
Fiestis di stamp religjôs, nassudis pe celebrazion di un Sant e par chest indreçadis viers iniziativis di aiût, lis sagris – che di religjosis a son deventadis gastronomichis – a son stadis un des primis esperiencis di volontariât e di solidarietât coletive, une scuele di formazion umane e sociâl par tante int che po dopo si è dade da fâ in cetantis manieris.
Luca Zoratti