Il coment di Guglielmo Pitzalis su la riforme sanitarie

“Il Friûl nol à di vê pôre: la sanitât furlane e à une fuarte tradizion di cambiaments e di inovazion, par stâi daûr al mont che al mudave e cun lui lis domandis de int”. A fevelâ cussì in cont de plui gnove riforme, chê volude de Zonte regjonâl di Debora Serracchiane, fate buine dal Consei regjonâl tal autun stât e inviade te pratiche cul prin di che chest an, al è Guglielmo Pitzalis, 40 agns di miedi il prossim an, pneumolic e igjenist, che al à lavorât in prin tal dispensari di Cividât e po tal Dipartiment di Prevenzion al Gervasutta.
“I prins articui suntune sanitât publiche che e veve di cambiâ cul concet che si è cjapât dentri te riforme di cumò – cambiâ la concezion dal ospedâl e dâ plui sanitât sul teritori – ju ai scomençâts a scrivi sul imprin dai agns Novante. Al jere bielzà di almancul dîs agns che la cuistion e veve di jessi frontade di pet”.
L’ospedâl, al continue, “e je une part dal percors di cure di une persone. Vuê si à dibisugne di un puest dulà lâ dopo il ricovero par un stât acût di malatie, par vie de etât de popolazion simpri plui alte o ben pe complessitât de cronicitât; si à dibisugne di assistence infermieristiche e sociâl stant a cjase. Atenzion, jo no poi la idee che si rivi scuasit a fâ l’ospedâl a cjase, par vie che lis fameis in cierts câs no rivin o no puedin jessi scliçadis dal pês de assistence. Bisugne dâ servizis, come puescj dulà podê poiâ il malât magari par pocjis zornadis, une specie di ospedâl rurâl, dulà che il miedi di famee al pues ricoverâ un pazient par cualchi timp e lâ viodi di lui alì”.
In cheste suaze, ospedâi cun tante cliniche e tante super tecnologjie “no covente che a sein sparniçâts par dut il teritori. A bastin pôcs e che a funzionin. Sul teritori si à di vê presidis di salût, residencis post ricovero ospedalîr, ospedâi di comunitât o claminju cemût che o volin”.
E chest, al sotlinee Pitzalis, “no vûl dî mancul rispueste ae domande di salût”. Al memoree ce che al è sucedût a Codroip vincj agns za fa, cuant al è stât sierât l’ospedâl. “Jo o jeri par che lu sierassin ma no par chel il teritori al è restât cence servizis. Che anzit a’nd’ à vûts di plui e corispondents ae domande de int e al à inviât une colaborazion di gale cul ospedâl di San Denêl là che e coventave”.
Duncje, scuasit si racomande Pitzalis, vuê “o disarès che nol è il timp des barufis o des rivendicazions, ma ogni teritori al varès di domandâsi: ce volino vê chent i? Bisugne capî cuale che e je la unitât di base plui impuartant e chê fâle deventâ alc e cè. Scombati par chel: une organizazion socio-sanitarie cun 8-10 miedis di famee, che e puedin vê ancje un pocje di strumentazion di base par i prins esams. Par chel che no si rive a dâ rispueste si rapuartisi cul Distret e cul ospedâl”. Insumis, “o podin creâ realtâts che a sei la ecelence de assistence abulatoriâl cun rapuarts strategjics e funzionants cui ospedâi di rêt e cui ospedâi hub”.
Une riforme che si fasarà scuasit di bessole? “No”, al rispuint cun ancjetante convinzion Pitzalis. Par che il teritori al dei rispueste di salût “si à di vê ben presint che si à di meti bêçs e int. E se un pôcs di professioniscj a saran chei che a saltaran fûr dai ospedâi, no bastaran”. Cun di plui, bielzà di subit e po lant indevant tai prossims agns, e je une altre scomesse di vinci, che e rivuarde la formazion. “Bisugne che cheste concezion de sanitât publiche e sei presint tal organizazion dai percors formatîfs di miedis e infermîrs: bisugne pontâ su la medisine di base e su une formazion infermieristiche di base e di comunitât”.
In cont po dal servizi di Emergence, “sì a une centrâl uniche dal 118 e a lis ambulancis ben furnidis, ancje cul defibrilatôr, tes zonis plui distantis e lontanis, metudis sul scomençâ des valadis”.
Par no vê pôre dai cambiament, Pitzalis al invide a butâ un voli te storie sanitarie di chenti. “Pensait – al puarte l’esempli par sierâ il discors – a ce che al è deventât il Gervasutta, che al è nassût sul finî dai agns Vincj come lazaret e po juste par curâ i efiets de Polio e je scomençade al sô storie di ospedâl di riabilitazion”. ❚
Antonella Lanfrit