SLOVENIE. La presince slovene a Expo 2015

Al mancje pôc aromai par che e tachi la Expo 2015 in program a Milan dal prin di Mai ai 31 di Otubar. Tra i 142 paîs che a parteciparan ae esposizion mondiâl che e varà tant che teme principâl »Nudrî il Planet, Energjie pe Vite« e sarà ancje la Slovenie, un dai 53 stâts che al disponarà di un propri paveon, presentât al public ai 20 e ai 21 di Març. La Slovenie e à sielt pe Expo il sproc “I feel Slovenie. Verde, ative e sane”. I cinc temis principâi (tant che i cinc sens) che a fasaran part de esposizion pemanente intal paveon a saran invezit: lis salinis, lis âfs, la aghe termâl e minerâl, l’escursionisim (ancje in biciclete) e il progjet di misurazion dal carboni neri.
Otime la posizion dal paveon sloven, che si slargje suntune superficie di plui o mancul 1900 metris cuadris (di 800 metris cuadris e je invezit la costruzion), tant vicin al Paveon Italie e ae crosere tra il Cardi e il Decuman – lis viis principâls de esposizion -. Ancje chest al fâs sperâ ae Slovenie di podê otignî risultâts otims de Expo: di fat, si spietin al paveon plui o mancul un milion di visitadôrs. La partecipazion ae esposizion mondiâl e je impuartante pe Slovenie ancje parcè che si tignarà a Milan, capitâl economiche e finanziarie de Italie che e je tra i plui impuartants compagns comerciâi de Slovenie. Cemût che al à sotlineât ae presentazion l’ambassadôr sloven a Rome Iztok Mirošič, il cumierç internazionâl tra Slovenie e Italie al à un volum di 6 miliarts di euros; se si contin ancje i servizis e il turisim si rive a cuote 7 miliarts. Il rapresentant de Agjenzie publiche Spirit a Milan (agjenzie che si interesse di promozion turistiche) Gorazd Skrt al à evidenziât che in Slovenie i visitadôrs plui fis e afezionâts (un ogni cinc) a son propit i talians. Ae presentazion dal paveon sloven al à partecipât ancje il ministri pal disvilup economic Zdravko Počivalšek che al à augurât ancje miôr colegaments feroviaris e aeris tra Slovenie e Italie, judicant insuficients o dal dut assents chei atuâi. La sperance di Počivalšek e je ancje che la industrie dal len e torni a jessi un dai setôrs che a tirin de economie slovene. La Slovenie e je di fat un tra i paîs europeans plui plens di boscs, che a cuvierzin plui o mancul il 60% de sô superficie. E al è propit il len, intune cul veri, il materiâl principâl che al è costruît il paveon de Slovenie, costât in complès 1,8 milions di euros. L’ûs dai materiâi naturâi al conferme ancje l’impegn de Slovenie bande la tutele dal ambient. La atenzion pe ecologjie e je dimostrade ancje dai obietîfs de Slovenie in cjamp energjetic: dentri dal 2020, il paîs al ponte a rivâ al 25% di energjie consumade prodote di fonts rinovabilis (intal 2013 la cuote e jere dal 21,5% e intal 2004 dal 16,1%).
Intal ambit de partecipazion de Slovenie ae Expo di Milan, dulà che a vignaran presentadis intal detai ancje lis singulis regjons de Slovenie, al vignarà dât spazi ancje ae comunitât slovene in Italie. Su iniziative dal Slovensko diželno gospodarsko združenje (Union regjonâl slovene economiche) e de Kmečka zveza (Associazion agricultôrs), ai 15 di Mai a presentaran la proprie ufierte une desene di ristoradôrs e cualchi produtôr di vin. Par ce che al tocje la part culturâl, tra i protagoniscj e sarà ancje la band etno-rock de Bencˇija BK Evolution, che di pôc e à publicât un gnûf cd. ❚
Tjaša Gruden