50 AGNS DE REGJON. La idee di une specialitât

Al è daspò la nassite de forme di guvier republican che il Stât talian, jessût dal scjasson dal Fassisim, al sielzè la strade dal decentrament aministratîf, traviers une schirie di Ents di nivel intermedi. Une vie che e fo dibatude e infin scrite de Assemblee Costituente, delegade tal 1946. E che in part e fo la rispueste naturâl, sburtade de Resistence, cuintri di un Stât che par vincj agns al jere stât acentradôr e imbastît suntun unic partît. La istituzion di regjons, cun compits e funzions lôr, e varès rapresentât une novitât. Dut chest, pal Friûl-Vignesie Julie – che la strade e sarà ancjemò plui lungje e cruziade di dutis chês altris regjons, fintremai te cuistion dal non – al volarà dî, soredut e su ducj, une date e une personalitât. La date: ai 18 di Dicembar dal 1946, ven a stâi cuant che la seconde sotcomission de Costituent, cun 17 vôts a pro e 10 contraris, e fâs buine la istituzion de Regjon Autonome pal nestri teritori. La personalitât, invezit, e fo chê di Tiziano Tessitori: ai 29 di Lui dal 1945, al veve fondât l’“Associazion pe autonomie furlane” e in Otubar si jere iscrit ae Dc (tal 1919 al veve aderît al Partît Popolâr). Cul Scût Crosât, al jere stât elet dentri de Costituent, pal coleç XI Udin – Belum (dongje dal coleç unic nazionâl, i “nestris” Paris Costituents a saran in dut 15, jenfri i 556 deputâts. No votarin lis popolazions des atuâls provinciis di Gurize e Triest, e de part orientâl di chê di Udin, tieris ancjemò contindudis e bagnadis di tensions internazionâls). Avocat, nassût a Sedean tal 1895 (propit chel paîs al à, vuê, un “Fondo Tessitori”, cun ducj i documents personâi de sô ativitât politiche, che a son ancje in part in rêt in gracie dai ricercjadôrs di UniUd e linkâts ai Archivis digjitâi dal Senât), al veve za capît il probleme dal ricognossiment de autonomie dal teritori e lu veve scrit tal Jugn dal 1945 su lis pagjinis di “Libertà”, orghin di stampe dal Cln locâl. Dal rest, la stesse Associazion pe Autonomie furlane e veve scomençade une propagande impuartante par une regjon che e coincidès cul Friûl storic, de Livence al Timau. Venit: adieu, par simpri.
A son i agns dal autonomisim e di un sintiment vivarôs di rivendicazion di specialitât, massime in cierts ambients culturâi. Su chest stes sfuei, par esempli, nassût tal 1946 tant che mieç che al sparniçave idei autonomistichis. Ai 19 di Zenâr, intant di une Assemblee dal “Moviment popolâr furlan pe autonomie regjonâl” (tra i fondadôrs Gianfranco D’Aronco, Chino Ermacora e Pier Paolo Pasolini) al Cine Puccini di Udin, Tessitori al ten il discors plui nomenât sul Friûl.
Cuintri lis ideis dal avocat di Sedean, il so stes partît, come dutis lis fuarcis politichis (la drete a cjâf), la stampe conservadore, la borghesie liberâl, ce che al jere restât dal moviment monarchic: dutis cu la pôre che la specialitât e podès esponi il teritori a rivendicazions slavis. Ai 27 di Jugn dal 1947, in gracie dal emendament “Tessitori”, la Costituente e da il bon acet a un Statût speciâl ancje pal nestri teritori regjonâl. Plui che i ecuilibris de politiche, al sarà il caratar sotan dai furlans la grande delusion dal politic democristian, pari dal Friûl. Ve un pas de letare mandade a Marchet: “Jo mi spietavi un grant sclop di calôr, une grande fieste e une sflamiade di fede rinovade e ancjemò plui ferme. Invezit, mi à parût che il Friûl al restàs scuasit frêt, pôc mancul che insensibil. In altris sîts la gnove di chel ricognossiment e varès dismot fûr manifestazions e luminariis e sbandieraments: e il Friûl, cidin o scuasit”. Passassial il cidinôr. Par dute rispueste, i plaçarin ancje une bombe sul puarton di cjase sô in viâl Vignesie, la gnot jenfri il 21 e 22 di Lui di chel an, par fortune cence conseguence. L’om che in cûr so al sperave che il gnûf ent si clamàs dome Friûl, ae fin al acetà la zonte dal “Vignesie Julie” tant che miôr compromès pussibil. ❚
Oscar Puntel