MUSICHE. La magjie in musiche di Aldo Rossi

Lenghis di gjat e sanc di un sborf mat bulîts te aghe di lat… Cûr di sarpint, ragn cence dincj cjapât cuant che al soflave il vint… Fers un moment. Vêso mighe pôre da lis striis? Se la rispueste e je “no”, po ben anìn indenant. Dulà? Intun zîr incjantât e spaurôs sù e jù pai trois de Cjargne e jenfri i segrets de mont dulà che nus puarte l’ultin lavôr di Aldo Rossi che si clame, juste apont, “Ta cove da Strie”. Il cjantautôr furlan, cjargnel di adozion, al è cambiât piel une volte ancjemò rispiet al dopli album “La vite e la muart” vignût fûr tal 2011 e de racuelte di curtis titolade “Miôr fâle curte” publicade tal 2013. E pe ocasion si è mudât intun fantasmatic eroi di non “Aldo dai Ros”. Chest al è un disc plen di magjie, dulà che il nestri cjantautôr nus mene pes antighis liendis e nainis  scoltâlis al è un pôc come fâsi contâ lis flabis di frutins par tornâ po a imagjinâlis cu la fantasie tal scûr de gnot. La grande mari e la grande strie protagoniste de storie e je jê, la Cjargne, tiere di len, di mans, di fam e di suspîr de anime. Par cui che al ricuarde ancjemò il toc “A là sù”, us segnalìn la bielissime “La cure” in version “unplugged” dome ghitare e vôs: “sielç la strade plui dure, e je chê che a clamin la cure e se tu sints a cjantâ, vierç il to cûr che si scjaldarà”. Une cjançon par chei che a àn vût une pierdite inte lôr vite (amôr, lavôr o dignitât). Oltri che magjic al è un cd ancje une vore artesanâl: Aldo Rossi al à scrit i tescj, lis musichis, e al à curât i rangjaments, il mixaç e la masterizazion. Une uniche man che e fâs sì che i dîs tocs a formin un unicum, fate ecezion par doi extra: il toc “Diferent”, biele interpretazion voltade par furlan di “La mauvaise réputation” dal cjantautôr francês Georges Brassens (ma tu dîsimi ce mâl chi jo o fâs se jessi compagn a mi no mi plâs, se un salvadi vêr come me nol è une piore che al sta tal gree) e pal bonus track finâl par talian dedicât al cjant di dolôr dal “Caiman” che cumò al “duar cun Dudù” e “tal jet di Putin nol salte plui”. Il gnûf “Aldo dai Ros” lu vin podût viodi dal vîf ai 6 di Dicembar li dal “Teatri Giovanni da Udine”, là che al à viert il conciert dal cjantautôr comasc Van de Sfroos (cun lôr ancje il nestri Luigi Maieron). Il disc invezit si pues discjamâlu di iTunes, Amazon e Google Play e si pues scoltâ in streaming su Spotify. Par ricevilu a cjase si scuen lâ su www.aldorossi.net. E no stait a vê masse pôre… lis striis no son cussì mâl. ❚
Natascia Gargano