Eletrodot Wurmlach-Samblâc. Ricors straordenari al President da Republiche Firmât di cinc sindics cjargnei

Si torne a fevelâ dal eletrodot Wurmlach – Samblâc e cheste volte in gracie di une iniziative impuarte cjapade di cinc sindics de Val de Bût: Zui, Çurçuvint, Paluce, Sudri e Tumieç.
Il sindic di Zui, Battista Molinari, al à intiessude la tele convocant i sindics interessâts al passaç dal eletrodot par valutâ insiemi la pussibilitât di presentâ un ricors pal anulament dal decret d.d. 03.07.2014 dal Ministri dal ambient e de tutele dal teritori e dal mâr, che in pratiche al à dât judizi positîf di compatibilitât ambientâl dal progjet “eletrodot Samblâc – Wurmlach”.
Ducj i sindics si son cjatâts dacuardi di fâ cuintri a chestis decisions e pôcs dîs fa a àn firmât il ricors straordenari al President da Republiche prontât dal avocat Francesco Marcolini di Tumieç.
“Mi auguri – al dîs il sindic di Zui – che il ricors al vegni acetât e che il progjet dal eletrodot aeri al vegni metût in bande par simpri.”
Ancje Massimo Mentil, sindic di Paluce, al conferme che “lis aministrazions precedentis di Paluce a son simpri stadis contraris al eletrodot; e sarès une infrastruture che e larès a ruvinâ ce che al è di primarie impuartance tal nestri teritori: l’ambient. E no varessin nissun benefici, e inmò mancul o podaressin pensâ a cualsisedi forme di compensazion.”
“Di bande di Çurçuvint – al dîs il sindic Luca Boschetti – mi tocje ringraciâ il sindic di Zui che al è partît in cheste iniziative. I ringracii chei altris sindics: finalmentri o vin la voie di lâ indevant insiemi, di jessi unîts, e chest al è un pont di partence ancje pe prossime sfide de riforme dai ents locâi.”
Par une volte un  grup di sindics al à cjalât un pôc plui in là dal propri ortut e si è dât dongje! E je ancje une dimostrazion che il lavôr puartât indevant in chescj agns dai Comitâts nol è stât fat dibant. I sindics a san che la int cjargnele plui di cualchi volte e je lade in place a bati i pugns cuintri un progjet che nol puarte nuie ni al teritori ni a la sô int, e che al va dome a vantaç di cui che lu à proponût. Al è di sperâ che la rose dai sindics si slargji e che magari une dì ducj i sindics de Cjargne si cjatin insiemi a scombati pe difese dal teritori, no dome pe cuistion eletrodot, ma ancje pe gjestion des aghis, pe gnove Comunitât e par dut chel che al rivuarde la difese de presince de int in mont. ❚
Marta Vezzi