Dibatit a Cividât, l’Europarlamentâr dal SVP Dorfmann: «autonomie no par fuarce positive: bisugne fâ robis di sest»

Vinars di sere ai 7 di Novembar si è davuelte a Cividât li dal centri Sant Francesc la cunvigne intitulade “Fevelant di autonomie”, un dai incuintris de rassegne “Gnots Furlanis 2014” organizâts de associazion La Grame, in chest câs organizât adun cul Front Furlan e la pro loco di Cividât. La serade no jere dentri dal program di Laboratori di Autonomie, ma us è contìn par vie che l’argoment al è chel e parcè che son vignudis fûr robis interessantis. La forme e je stade chê di un incuintri-dibatit cul Europarlamentâr Herbert Dorfmann. Presints cun lui “daûr dal taulin” il conseîr regjonâl de Slovenska Skupnost Igor Gabrovec e il conseîr provinciâl Federico Simeoni dal Front Furlan, il dut vuidât dal moderadôr Giovanni Stocco.
Tal sô intervent Herbert Dorfmann, dopo un ricuart dai 25 agns de colade dal mûr di Berlin, al dîs chel che al è par lui la autonomie, ven a stâi il principi de sussidiaretât, dulà che ogni decision e à il plui pussibil jessi fate buine al nivel plui piçul, il plui pussibil dongje de int. Ma no je par fuarce il model miôr: e je une oportunitât. Al fâs di fat il confront cun la autonomie speciâl di regjons tant che Trentin-Sud Tirôl e Friûl, e une come la Sicilie, cun spesis aromai fûr di control. «La autonomie no puarte par fuarce bon stâ», al dîs citant il resint libri dal professôr Gianfranco Cerea “Le autonomie speciali. Le vicende e i possibili sviluppi dell’altro regionalismo”, li che si fâs un confront jenfri il Pil des variis regjons in diviars periodos storics dulà che si viôt che dopo la “specialitât” cualchidune e à vuadagnât, aprofitant de oportunitât apont, e cualchidune pierdût.
A la domande se al sarès pussibil e in ce maniere rivolzisi ae Union Europeane par viodi tutelâts i dirits de comunitât furlane, par esempli te atuazion plene de leç 482 tal cjamp de scuele, al à dit che nol è di spietâsi cuissà ce in chest moment. No dome a son pocjis lis risorsis che si spindin pes lenghis storichis minorizadis rispiet a chês dai Stâts che componin la UE, ma adiriture tancj membris a son contraris su la tutele, par pôre di chei che a clamin i “piçui nazionalisims”.
Federico Simeoni al à fevelât in gjenerâl de situazion, avonde lamie, de autonomie dal Friûl fasint ancje un excursus storic sul Friûl e su cemût che si è rivâts ae situazion di vuê.
Tal sô intervent, Igor Gabrovec fevelant di partîts autonomiscj di çoc furlanist, si è mostrât viert a une colaborazion, ma su la scjarsetât dal lôr podê al à dit che il probleme a son i furlans che e varessin di vê plui cussience di jessi popul e de lôr storie, «ma no son robis che a cressin in pôc timp». Come esempli al cite che in Regjon la scuasit totalitât dai conseîrs furlans no fevelin in marilenghe cuant che a son in Consei, par fevelâlu a sbreghebalon subit dopo al bar. A proposit di une elaborazion de autonomie che podarès vignî dai partîts talians, al sosten che ancje se organizâts a nivel locâl, chei a rispuindin simpri a logjichis romanis e duncje nol è di spietâsi cuissà ce.
In code de serade, devant dai ospits, une barufe jenfri chei dal Front Furlan: di une bande Federico Simeoni, di chê altre il gnûf president Mirco Rossi cun daûr altris de sô stesse linee tal public. Propit la perfete spie dal parcè che in Friûl no vin un partît autonomist fuart e madûr: bulos! ❚
Dree Venier