CURTIS E CHE SI TOCJIN. Partîts, movêtsi!

Magari cussì no, la convivence cun Triest e prodûs al Friûl simpri plui impediments ai siei dirits di identitât e di gnovis spietis. In chescj mês, daspò la disfide de mozion dal Consei comunâl de citât juliane e la grande cagnare di culà vie cuintri la leç di pupilance de lenghe furlane, o vin cif e çaf a difindi la autonomie, la identitât e fintremai la esistence de Universitât dal Friûl.
Profitant dai berdeis economics dal nestri Ateneu, provocâts dai tais fuartons ai finanziaments de bande dal Guvier di Rome, i ambients triestins – cu la assessore regjonâl ae Universitât Rosolen in prime file e cul sfuei «il Piccolo» lôr puartevôs – a àn tacât a bati il tambûr su la dibisugne di sparagnâ tes spesis des dôs Universitâts di chenti. Stant che il FVJ e je une piçule regjon – cussì a disin – , si varès di lâ a une Fondazion uniche che e proviodi a cjapâ sù bêçs de Regjon, di altris Ents publics e privâts e di impresis produtivis, par dâju aes dôs Universitâts. Cussì, come simpri, tancj bêçs cjapâts sù in Friûl a laressin a finîle a Triest e lis decisions su ce che l’Ateneu di Udin al varès di fâ, o di no fâ, no saressin cussì cjapadis de Universitât furlane e dai furlans… Di plui, cun chê di coordenâ i doi Ateneus, cence plui doplons e strassariis, a volaressin rivâ – parcè no?, a disin i triestins – a fânt une sole. Ma cul cjâf a Triest, e la crôs parsore…a chê di Udin.
La Provincie e il Comun di Udin, lis categoriis economichis e i sindacâts, la arcidiocesi dal Friûl centrâl, il Comitât pe autonomie dal Friûl e cetancj altris, a àn firmât ai 27 di Otubar dal 2008 un Pat cu la Universitât, dulà che a refudin chest atac di Rome e di Triest ae autonomie e ae identitât dal Ateneu di Udin. E a ricuardin a ducj chei che i son contraris, che par vie de sô leç istitutive, l’Ateneu al è clamât a operâ pe formazion di mistîrs cualificants dai zovins furlans e pal disvilup economic, sociâl, linguistic e culturâl dal Friûl intîr.
O vin bielzà dit – e lu tornìn a vê indiment ancjemò une volte – che par passâ su chescj obietîfs cuintri la Universitât dal Friûl, i triestins e i politics furlans che ur tegnin bordon, a àn di savê in anticip che a varan di scontrâsi di brut cun ducj i furlans che a vuelin ben al Friûl e al so popul.
Di chest cantin, che si zonte a tantis altris prepotencis triestinis viers il Friûl, e ven fûr cun simpri plui fuarce la esigjence di fermâ finalmentri chest impaçâsi forest sul avignì de nestre tiere. Ancje cence spacâ la Regjon, o vin dibisugne sul seri di cjatâ la vie che Triest e il Friûl a stedin ognidun par so cont, lavorant e cressint finalmentri in pâs. Vuê al è pussibil, su la fonde des competencis legjislativis primariis de nestre Regjon, otignî – di une bande – l’autoguvier di Triest cu la aree metropolitane e – di chê altre – il Friûl unît e governât de Comunitât des Provinciis furlanis.
Curtis e che si tocjin, inalore. Ai politics furlans di ducj i partîts o disìn clâr e net: movêtsi salts e insiemit pe cause e pai interès dal Friûl. O volêso che tancj di lôr a scomencin a pensâ di meti adun un grant moviment politic autonomist, come ultime vie par obleâus a movisi pal Friûl?
ARNALT BARACÊT