Branduardi li de contrade de ocje

Cjalade svelte aes datis dal tour: a son Rome, Milan e po Paris, Strasbourg, Munchen e… Fane. Mil e cinccent abitants plui o mancul, in provincie di Pordenon. Sabide ai 20 di Setembar passât il cjantautôr lombart Angelo Branduardi al è passât par chi, ospit de aziende agricole “La contrada dell’oca”. No un teatri nazionâl o un stadi, il palc al jere sot des stelis dongje de mont a pôcs metris des stalis e dai cjamps di forment. In cheste fatorie sociâl vie pal dî a lavorin une desine di personis tai cjamps biologjics, tal ort e a fâ la lane. Uchì si cjatin lis pioris “d’Amiata”, che a son in vie di estinzion, a cressin i miluçs antics di Fane e a corin, clâr, lis ocjis furlanis. Daûr di dut chest al è Paolo Paron, fondadôr de associazion Vieri Rôl e de “Società Tolkieniana italiana”, e gjestôr de fatorie. «O ai cognossût Angelo une desine di agns indaûr, a un pâr di conferencis a Verone e al Parlament european di Strasburg dulà che lui al fevelave di musiche antighe e jo di tradizion orâl popolâr» nus dîs «di in chê volte o vin mantignût i contats e cuant che i ai domandât di vignî a fâ un conciert in fatorie al à dit di sì vulintîr». Branduardi al è un espert di musiche medievâl e tes sôs ricercjis al è vignût ancje in contat cul Friûl: «Angelo al cognòs la musiche tradizionâl furlane» al dîs Paron «i plâs tant Giorgio Mainero. Za tal so toc “Ballo in fa diesis minore” dal album “La pulce d’acqua” dal 1977 al veve doprade une version di “Schiaraçule maraçule”, che e à contribuît a dinfondi chest bal popolâr furlan». Al sucêt cussì di lâ ator pal Friûl, cu lis Prealpis Ocidentâl sul font, e di cjatâ Angelo Branduardi che al mangje pitine li de tratorie Edelweiss di Fane. Cussì, intune Sabide di sere di fin Istât. ❚
✒ N.G.